దేశ రాజకీయాల్లో ఏదో అలజడి జరగబోతోంది.. పవార్ రాజీనామాపై శివసేన ఎంపీ

శరద్ పవార్, నేషనలిస్ట్ కాంగ్రెస్ పార్టీ (NCP) అధ్యక్షపదవికి రాజీనామా చేయడంపై శివసేన ఉద్దవ్ వర్గం ఎంపీ సంజయ్ రౌత్ స్పందించారు. పవార్ అంత పెద్ద నిర్ణయం తీసుకన్నారంటే కచ్చితంగా ఏదో బలమైన కారణం ఉండి ఉంటుందని అభిప్రాయపడ్డారు. మహారాష్ట్ర రాజకీయాల్లోనే కాదు, దేశ రాజకీయాల్లోనూ ఏదో అలజడి జరగబోతోందని ఆయన ఆందోళన వ్యక్తం చేశారు.

శరద్ పవార్ మంగళవారం నాడు తాను ఎన్‌సిపి చీఫ్ పదవి నుండి వైదొలగాలని నిర్ణయించుకున్నట్లు ప్రకటించగా, శివసేన (యుబిటి) నాయకుడు సంజయ్ రౌత్ పవార్ మహారాష్ట్ర రాజకీయాల ఆత్మ అని అభివర్ణించారు.పవార్ రాజీనామా నిర్ణయాన్ని శివ‌సేన వ్యవస్థాపకుడు బాల్ ఠాక్రే 'రాజీనామా'తో పోల్చారు.

ట్విటర్‌లో రౌత్ కామెంట్ చేస్తూ, “మురికి రాజకీయాలతో విసిగిపోయిన శివసేన అధినేత బాలాసాహెబ్ ఠాక్రే కూడా శివసేన ప్రముఖ్ పదవికి రాజీనామా చేశారు. చరిత్ర పునరావృతం అయినట్లు కనిపిస్తోంది.. కానీ శివసైనికుల ప్రేమ కారణంగా ఆయన తన నిర్ణయాన్ని ఉపసంహరించుకోవలసి వచ్చింది.. బాలాసాహెబ్ లాగా పవార్ సాహెబ్ కూడా తన నిర్ణయాన్ని వెనక్కి తీసుకుంటారని ఆశిస్తున్నాను.'' అన్నారు.

ఆశ్చర్యకరంగా, 1999 లో తాను స్థాపించి, నాయకత్వం వహిస్తున్న నేషనలిస్ట్ కాంగ్రెస్ పార్టీ (ఎన్‌సిపి) చీఫ్ పదవికి రాజీనామా చేస్తున్నట్లు పవార్ మంగళవారం చెప్పారు.

తన ఆత్మకథ యొక్క రివైజ్డ్ వెర్షన్ ఆవిష్కరణ సందర్భంగా పవార్ ఈ ప్రకటన చేశారు. ఈ ప్రకటనపై పార్టీ కార్యకర్తలు, నాయకులు నిరసన వ్యక్తం చేస్తున్నారు. ఈ నిర్ణయాన్ని ఉపసంహరించుకోవాలని డిమాండ్ చేస్తున్నారు.రాష్ట్రానికి, దేశానికి పవార్ సాహెబ్ అవసరం అని ఎన్‌సిపి నాయకుడు అనిల్ దేశ్‌ముఖ్ అన్నారు.

"పార్టీ (ఎన్‌సిపి) చీఫ్‌గా పవార్ సాహెబ్ కొనసాగాలని ప్రతి ఒక్కరూ పట్టుబడుతున్నారు. మేము అతని నిర్ణయాన్ని సమీక్షించమని కోరాము" అని ఆయన ఒక మరాఠీ న్యూస్ ఛానెల్‌తో అన్నారు.

నాలుగు సార్లు మహారాష్ట్ర ముఖ్యమంత్రిగా, కేంద్ర రక్షణ, వ్యవసాయ మంత్రిగా పనిచేసిన పవార్, 2019 తర్వాత మహా వికాస్ అఘాడి (MVA) ప్రభుత్వాన్ని ఏర్పాటు చేయడానికి NCP, కాంగ్రెస్,శివసేన కూటమిని కూర్చడంలో కీలక పాత్ర పోషించారు.