కేసీఆర్ మాట వినండి....తెలంగాణ లో ప్ర‌త్య‌మ్నాయ పంటలకు ఇదే మంచి త‌రుణం!
తెలంగాణలో ఇప్పటికైనా ప్రత్యామ్నాయ పంటలవైపు రైతులు అడుగులు వేయకపోతే చాలా నష్టాలు చవిచూడాల్సి వస్తుందని నిపుణులు హెచ్చరిస్తున్నారు. వరి, పత్తి పంటలను మాత్రమే వేయకుండా రాష్ట్ర ప్రభుత్వం చెప్పిన విధంగా ఇతర పంటలవైపు రైతులు మళ్ళాలని నిపుణులు సూచిన్నారు.
ఒక‌ప్పుడు బీడు భూములుగా ఉన్ననేల‌లో నేడు జ‌ల‌సిరులు కురిపిస్తూ తెలంగాణ రాష్ట్ర ప్రభుత్వం ఎంతో శ్ర‌మించి మంచి ఫ‌లితాలు రాబ‌ట్టింది. రైతుల ఇంట మ‌రింత‌గా సిరిసంప‌ద‌ల‌ను పెంచేందుకు పంట‌మార్పిడుల‌ను ప్రోత్సహిస్తోంది. సంప్ర‌దాయ‌క వరి, పత్తి పంటలకు బ‌దులు ఇతర లాభ‌దాయ‌క పంటల సాగు చేయాల‌ని ప్రభుత్వం సూచిస్తోంది. సమగ్ర వ్యూహంతో నష్టాలను తగ్గించడమే కాకుండా రైతులు అధిక ఆదాయాన్ని పొందడంలో సహాయపడుతుందని ముఖ్య‌మంత్రి కెసిఆర్ ప‌లు సంద‌ర్భాల్లో రైతుల‌కు సూచించారు. అధిక ఆదాయం వస్తుందని ఎంతో భ‌రోసా క‌ల్పించారు.
అయినా ఆన‌వాయితీగా వ‌స్తున్న అల‌వాటును వ‌దులుకోలేకో, కొత్త పంటల సాగుపై న‌మ్మ‌కం లేకో గానీ ప్రభుత్వం ఆశించిన స్థాయిలో ఇతర పంటల సాగు క‌న‌బ‌డ‌డం లేద‌ని వ్యవసాయ రంగ నిపుణులు అభిప్రాయ‌ప‌డుతున్నారు. కేవ‌లం ఈ రెండు పంటలపైనే మితిమీరి ఆధారపడటం వలన ఉత్పత్తితో పాటు ధరల పై కూడా ప్ర‌తికూల ప్ర‌భావం ప‌డుతుందంటున్నారు. తెగుళ్లు, వ్యాధుల వ్యాప్తి, పర్యావరణ మార్పుల కారణంగా పెను వినాశనానికి దారి తీసే ప్ర‌మాదం ఉంటుందని శాస్త్ర‌వేత్త‌లు హెచ్చరిస్తున్నారు.
వరి ఉత్పత్తిలో అగ్ర‌స్థానం..
వరి ఉత్పత్తిలో తెలంగాణ రాష్ట్రం అగ్ర‌గామిగా ఉంది. కాగా, పత్తి సాగులో తెలంగాణ దేశంలోనే రెండ‌వ అతిపెద్ద రాష్ట్రంగా ఉంది. రాష్ట్ర ప్రభుత్వం ఇస్తున్న నిరంత‌ర విద్యుత్ స‌ర‌ఫరా వల్ల బోర్ల కింద కూడా వరి సాగు విస్తీర్ణం పెరిగింది. రాష్ట్ర వ్యవసాయ జిడిపిలో పంట ఉత్పత్తి 43శాతం వాటాను కలిగి ఉంది, మిగిలిన వాటాలో పశువుల పెంప‌కం, పాడి, పౌల్ట్రీ ప‌రిశ్ర‌మ‌లు వంటివి ఉన్నాయి.
తెలంగాణలో నికర విస్తీర్ణం 135.63 లక్షల ఎకరాలు కాగా స్థూలంగా పంటల విస్తీర్ణం 203 లక్షల ఎకరాలు. రాష్ట్రంలో నికర సాగునీటి వ‌న‌రుల ప్రాంతం దాదాపు 55 లక్షల ఎకరాలు ఉండ‌గా, 78.1 లక్షల ఎకరాల స్థూల సాగునీటి ప్రాంతంగా ఉంది. రాష్ట్రంలోని 59.48 లక్షల మంది రైతుల్లో 65శాతం మంది ఒక హెక్టారు (2.47 ఎకరాలు) లోపు భూమి ఉన్న రైతులే ఉన్నార‌ని గ‌ణాంకాలు చెబుతున్నాయి.
వర్షాకాలంలో ప్రధానంగా పత్తి (విత్తిన విస్తీర్ణంలో) 45శాతం, వరి 39శాతం విస్తీర్ణంలో సాగు చేస్తుండ‌గా ఎర్రజొన్న, మొక్కజొన్న, సోయాబీన్ పంటల సాగు తక్కువగా ఉంది. వర్షానంతర కాలంలో, సాగు విస్తీర్ణంలో ఎక్కువ భాగం అంటే 77 శాతంతో వరి, కొన్ని ప్రాంతాలలో మొక్కజొన్న 7శాతం, బెంగాల్ గ్రాము 5శాతం, వేరుశెనగ 4శాతం మేర సాగు చేస్తారు. రాష్ట్రంలో వరి , పత్తి పంట‌లే వేయ‌డం వల్ల సేకరణలో సమస్యలతో పాటు ధరల విష‌యంలోనూ కూడా ఒడిదుడుకులు ఎదుర్కోవాల్సి వ‌స్తోంది.
రాష్ట్రంలో సుస్థిర వ్యవసాయాభివృద్ధికి పంటల వైవిధ్యం మాత్రమే కాకుండా రోజురోజుకు డిమాండ్ పెరుగుతున్న పశువుల పెంప‌కం, పాడి పరిశ్రమ, మాంసం, మత్స్య రంగాల వైపు మ‌ళ్ళాల్సిన అవసరం ఉందంటున్నారు నిపుణులు. ఈ ప్ర‌త్య‌మ్నాయ వ్యూహం రైతుల ఆదాయాలకు భ‌రోసా క‌ల్పిస్తూ హెచ్చుతగ్గుల ధరలు, వాతావరణ మార్పులను తట్టుకునేలా చేస్తుంది. అంతేగాక అధిక ఆదాయాన్నిపొందే అవ‌కాశం ఉంటుందని నిపుణులు సూచిస్తున్నారు.
ఉద్య‌మ స్థాయిలో ప్ర‌య‌త్నించాలి..
సాగునీటి వ‌న‌రులు స‌రిప‌డా ఉన్నందున పామాయిల్, పండ్లు, కూరగాయల పంటలను కూడా ప్రభుత్వం పెద్దఎత్తున ప్రోత్సహిస్తోంది. గత రెండు మూడేళ్ళ‌గా రాష్ట్ర ప్రభుత్వం పప్పుధాన్యాలు,నూనె గింజలు వంటి ప్రత్యామ్నాయ పంటలను చేర్చడానికి ప్రయత్నిస్తున్నా రైతుల అనాస‌క్తి వల్ల పెద్దగా విజయం సాధించడం లేదు. ధాన్యం సేకరణ సమస్యలతో పాటు పైన పేర్కొన్న ఇతర నష్టాలను నివారించడానికి ఉద్య‌మ స్థాయిలో పంటల వైవిధ్యీకరణను చేపట్టాల్సిన సమయం ఆస‌న్న‌మైంద‌ని శాస్త్ర‌వేత్త‌లు చెబుతున్నారు.
ఒక జిల్లా-ఒక ఉత్పత్తి విధానంలో, ప్రతి జిల్లాలో ప్రాసెసింగ్ యూనిట్లు, పంటకోత, అనంతర మౌలిక సదుపాయాలు వంటి అవసరమైన ప్రాథమిక పంట-నిర్దిష్ట మౌలిక సదుపాయాలను గుర్తించి అందించడం ద్వారా రైతులు లాభ‌దాయ‌క పంటలకు మారేలా ప్రోత్సహించడానికి ప్రభుత్వం క్రాప్ కాలనీలు ఏర్పాటు చేస్తోంది. వ్యవసాయ శాఖ కూడా ప్రదర్శనలు, వ్యవసాయ యాంత్రీకరణ, ఇతర నిర్దిష్ట కార్యకలాపాల ద్వారా ప్రత్యామ్నాయ పంటలను ప్రచారం చేస్తోంది.
పామాయిల్, పండ్ల‌తోట‌లు, వెదురు, వ్యవసాయ-అటవీ ఉత్పత్తిని ప్రోత్సహించడానికి పంటల వైవిధ్యీకరణ లక్ష్యంతో తెలంగాణ రాష్ట్రంలో అనేక పథకాలు అమలులో ఉన్నాయి. పామాయిల్ వంటి ప్రత్యామ్నాయ పంటలను పండించడానికి నగదు ప్రోత్సాహకాలు కూడా ఉన్నాయి, కానీ పెద్దగా విజయం సాధించడం లేదంటే ఇతర ప్రత్యామ్నాయ పంటల ప్రోత్సాహానికి గత విధానాలు స‌రిగా లేక‌పోవ‌డమే ప్ర‌ధాన కారణంగా చెబుతున్నారు. పంటల వైవిధ్యాన్ని ప్రోత్సహించడానికి దీర్ఘకాలిక స్థిరమైన విధానాలు ఈ సమయంలో అవసరం.
ఏమేం చ‌ర్య‌లు తీసుకోవాలి..
రాష్ట్రంలో ప్రత్యామ్నాయ పంటలను ప్రోత్సహించేందుకు కనీస మద్దతు ధర (ఎంఎస్పి)తో సేకరణను సమర్థంగా అమలు చేయడం ద్వారా ప్రభుత్వం ఒక నిర్దిష్ట ధర హామీని ఇవ్వాలి. అంతేకాకుండా, దిగుబడిని పెంచే సాంకేతిక విధానాల‌ను ప్రభుత్వం ప్రోత్సహించాలి. గ్రామీణ రహదారులు, నిల్వచేసుకునేందుకు గోడౌన్ల వంటి మౌలిక సదుపాయాలు, మెరుగైన మార్కెట్ అనుసంధాన మౌలిక సదుపాయాలు స‌మ‌కూరిస్తే ఉద్యానవన పంటల వంటి అధిక-లాభ‌దాయ‌క పంటల వైపు మారేందుకు సహాయపడతాయని అధ్యయనాలు సూచిస్తున్నాయి.
