సెప్టెంబర్ 17న జాతీయ సమైక్యతా దినం: తెలంగాణ మంత్రివర్గం నిర్ణయం
సెప్టంబర్ 17వ తేదీని జాతీయ సమైక్యతా దినంగా పాటించాలని తెలంగాణ మంత్రివర్గం నిర్ణయించింది. 16, 17, 18 తేదీల్లో రాష్ట్ర వ్యాప్తంగా వ‌జ్రోత్స‌వాల‌ను కూడా నిర్వ‌హించాల‌ని కూడా కేబినెట్ నిర్ణయించింది.
సెప్టంబర్ 17 పై తెలంగాణ మంత్రి వర్గం కీలక నిర్ణయం తీసుకుంది. ఆ రోజును జాతీయ సమైక్యతా దినంగా ప‌రిగ‌ణించాల‌ని కేబినెట్ నిర్ణయించింది. సెప్టెంబర్ 17న జాతీయ సమైక్యతా దినాన్ని రాష్ట్రవ్యాప్తంగా ఘ‌నంగా నిర్వ‌హించాల‌ని కూడా కేబినెట్ తీర్మానించింది.
తెలంగాణ ముఖ్యమంత్రి కేసీఆర్ అధ్యక్షతన ప్రగతి భవన్ లో ఈ రోజు మంత్రివర్గ సమావేశం జరిగింది. పలు కీలక అంశాలపై దాదాపు మూడు గంటలపాటు మంత్రివర్గం చర్చలు జరిపింది. నిజాం రాచరిక పరిపాలన నుంచి ప్రజాస్వామిక వ్యవస్థలోకి జరిగిన తెలంగాణ పరిణామక్రమం, 2022 సెప్టెంబర్17 నాటికి 75 సంవత్సరాల్లోకి అడుగుపెడుతున్నది. ఈ నేపథ్యంలో 2022 సెప్టెంబర్ 17 ను 'తెలంగాణ జాతీయ సమైక్యతా దినం' గా పాటించాలని, 16,17,18 తేదీల్లో జాతీయ సమైక్యతా దినోత్స‌వాల్లో భాగంగా వ‌జ్రోత్స‌వాల‌ను కూడా నిర్వ‌హించాల‌ని కూడా కేబినెట్ నిర్ణయించింది.
