పోలింగ్ కి ముందే బీఆర్ఎస్ కి గుడ్ న్యూస్..

తెలంగాణలో పోలింగ్ కి ముందే బీఆర్ఎస్ కి ఇది శుభవార్త అని చెప్పాలి. జాతీయ పార్టీగా అవతరించాలని చూస్తున్న బీఆర్ఎస్ కి మహారాష్ట్ర పంచాయతీ ఎన్నికల్లో ఆసక్తికర ఫలితాలు వచ్చాయి. విశేషం ఏంటంటే.. కాంగ్రెస్, బీజేపీకి కూడా అక్కడ ఆ స్థాయిలో పాజిటివ్ ఫలితాలు రాలేదు. రచ్చ గెలిచిన బీఆర్ఎస్, ఇక ఇంట గెలవడం పెద్ద విశేషమేమీ కాదంటున్నారు ఆ పార్టీ నాయకులు.

మహారాష్ట్రలోని భండారా జిల్లాలో ఏకంగా 9 గ్రామ పంచాయతీలను బీఆర్ఎస్ కైవసం చేసుకొని బోణీ కొట్టింది. భండారా జిల్లాలోని 66 గ్రామ పంచాయతీలకు ఎన్నికలు జరగగా 20 చోట్ల ఫలితాలు వచ్చాయి. ఇందులో బీఆర్ఎస్ 9 గ్రామ పంచాయతీల్లో గెలిచి సత్తా చాటింది. ఆ జిల్లాలో బీజేపీ, కాంగ్రెస్ పార్టీలు ఇప్పటి వరకు రెండు గ్రామ పంచాయతీలను మాత్రమే గెలుచుకున్నాయి. ఎన్సీపీ ఒక గ్రామ పంచాయతీలో విజయం సాధించింది. తెలంగాణ ఎన్నికల వేళ బీఆర్ఎస్ పార్టీకి ఈ విజయం మరింత ఉత్సాహాన్నిస్తుందని అంటున్నారు.

టీఆర్ఎస్‌ ను బీఆర్ఎస్‌ గా మార్చి సీఎం కేసీఆర్ దేశ రాజకీయాలపై దృష్టి పెట్టిన విషయం తెలిసిందే. రెండు నెలల క్రితం విస్తృతంగా మహారాష్ట్రలో పర్యటించి పార్టీని బలోపేతం చేశారు. ఈ క్రమంలోనే మహారాష్ట్ర గ్రామ పంచాయతీ ఎన్నికల్లో బీఆర్ఎస్ తరపున అభ్యర్థులు బరిలో నిలిచారు. గణనీయమైన ఫలితాలు సాధించారు.