హైదరాబాద్ లో ‍'బయోలాజికల్ ఇ' విస్తరణ... 1800 కోట్ల నూతన పెట్టుబడి,కొత్తగా 2500 మందికి ఉపాధి

"వ్యాక్సిన్ క్యాపిటల్ ఆఫ్ ది వరల్డ్"గా ఉన్న హైదరాబాద్ స్థానాన్ని మరింత సుస్థిరం చేస్తూ ఆ రంగంలో 1800 కోట్లకు పైగా పెట్టుబడి పెట్టడానికి 'బయోలాజికల్ ఇ' ముందుకొచ్చింది. తెలంగాణ ఐటీ శాఖా మంత్రి కేటీఆర్ తో ఆ సంస్థ మేనేజింగ్ డైరెక్టర్ మహిమా దాట్ల ఈ రోజు సమావేశమైన అనంతరం ఈ ప్రకటన వెలువడింది. ఈ సమావేశంలో పరిశ్రమలు, వాణిజ్య శాఖ ప్రిన్సిపల్ సెక్రటరీ శ్రీ జయేష్ రంజన్, తెలంగాణ ప్రభుత్వ లైఫ్ సైన్సెస్ డైరెక్టర్ శక్తి ఎం నాగప్పన్ కూడా పాల్గొన్నారు.

1800 కోట్ల పెట్టుబడితో జీనోమ్ వ్యాలీలో ఈ సంస్థ తన కార్యకలాపాల విస్తరణ కార్యక్రమాన్ని ప్రకటించింది. ప్రాథమికంగా ఈ సంస్థ జెనరిక్ ఇంజెక్టబుల్స్, R&Dతో పాటు వ్యాక్సిన్‌ల తయారీని వేగవంతం చేయడం లక్ష్యంగా పెట్టుకుంది. దీనిలో 2518 మందికి ఉపాధి లభిస్తుంది.

ఇప్పటి వరకు వాక్సిన్ల తయారీలో హైదరాబాద్ సంవత్సరానికి 9 బిలియన్ డోస్ ల‌ ఉత్పత్తి తో ప్రపంచంలో ఉత్పత్తి అయ్యే వ్యాక్సిన్ లలో మూడవ వంతు అందిస్తోంది. బయోలాజికల్ E ఉత్పత్తి చేయబోయే 5 బిలియన్ డోస్‌ల ద్వారా మొత్తం ఉత్పత్తి 14 బిలియన్ డోస్‌లకు పెరుగుతుంది.

జాన్‌సెన్ కోవిడ్ వ్యాక్సిన్, ఎంఆర్ వ్యాక్సిన్, పిసివి వ్యాక్సిన్, టైఫాయిడ్ వ్యాక్సిన్, కోవిడ్ వ్యాక్సిన్, టెటానస్ టాక్సైడ్ ఆంపౌల్స్, ఐపివి వ్యాక్సిన్, పెర్టుసిస్ వ్యాక్సిన్, బయోలాజికల్ ఎపిఐలు , ఫార్ములేషన్‌లు, సిఆర్‌ఐఎన్‌1 జెనరిక్ ఇంజెక్ట్‌తో కూడిన స్పెషాలిటీ ఇన్వెస్ట్‌మెంట్‌పై ప్రధానంగా బయోలాజికల్ ఇ పెట్టుబడులు కేంద్రీకరించబడుతాయి.

ఈ సమావేశం సందర్భంగా మంత్రి కేటీఆర్ మాట్లాడుతూ జీనోమ్ వ్యాలీలో 'బయోలాజికల్ ఇ' విస్తరణ ప్రణాళికలను ప్రకటించినందుకు ఆనందంగా ఉందన్నారు. హైదరాబాద్‌ను ఇప్పటికే "వ్యాక్సిన్ క్యాపిటల్ ఆఫ్ ది వరల్డ్" అని పిలుస్తారని, 'బయోలాజికల్ ఇ' ఈ నూతన విస్తరణ వల్ల వ్యాక్సిన్ రంగంలో హైదరాబాద్ మరింత శక్తివంతంగా తయారవుతుందని కేటీఆర్ అన్నారు.

తెలంగాణ ముఖ్యమంత్రి కేసీఆర్, మంత్రి కేటీఆర్ ల దూర దృష్టికి తాను కృతజ్ఞతలు తెలుపుతున్నాను అని బయోలాజికల్ ఇ మేనేజింగ్ డైరెక్టర్ మహిమ దాట్ల అన్నారు. ఈ కరోనా మహమ్మారి కాలంలో కూడా తమ సంస్థ విస్తరణ ప్రణాళికలు సులభతరం అయ్యేవిధంగా సహకరిస్తారని ఆశిస్తున్నాను అని అన్నారామె.