ఈనెల 15న బీఆర్ఎస్ పార్లమెంటరీ పార్టీ సమావేశం

ఈనెల 18నుంచి పార్లమెంట్ ప్రత్యేక సమావేశాల నేపథ్యంలో బీఆర్ఎస్ పార్లమెంటరీ పార్టీ మీటింగ్ ప్రాధాన్యత సంతరించుకుంది. ఈనెల 15న సీఎం కేసీఆర్ ఆధ్వర్యంలో ప్రగతి భవన్ లో ఈ సమావేశం జరుగుతుంది. బీఆర్ఎస్ ఎంపీలంతా ఈ సమావేశానికి హాజరవుతారు. పార్లమెంట్ ప్రత్యేక సమావేశాల్లో బీఆర్ఎస్ అనుసరించాల్సిన వ్యూహాలపై చర్చిస్తారు.

పార్లమెంట్ ప్రత్యేక సమావేశాల వ్యవహారం ప్రస్తుతం దేశంలో హాట్ టాపిక్ గా మారింది. అజెండా ఏంటనేది ఇంకా అధికారికంగా బయటకు రాలేదు. పార్లమెంట్ నూతన భవనంలోకి మారే క్రమంలో ఈ సమావేశాలు జరుగుతున్నాయని తెలుస్తోంది. అదే సమయంలో జమిలి ఎన్నికల వ్యవహారం కూడా చర్చకు వస్తోంది. మహిళా బిల్లు కూడా ప్రవేశపెట్టే అవకాశముందని అంటున్నారు. ఈ క్రమంలో ఎన్డీఏ వైరి వర్గాలు ఈ సమావేశాల్లో ఏవైపు మొగ్గుచూపుతాయనేది ఆసక్తిగా మారింది.

పార్లమెంట్ ప్రత్యేక సమావేశాల నేపథ్యంలో వివిధ పార్టీలన్నీ ఎంపీలతో మీటింగ్ లు పెడుతున్నాయి. తెలుగు రాష్ట్రాలకు సంబంధించి సీఎం జగన్ కూడా ఈ వ్యవహారంపై దృష్టిసారించారు. ఆయన ఢిల్లీ పర్యటన కూడా ప్రత్యేక సమావేశాలతో ముడిపడి ఉంది అంటున్నారు. ఇటు బీఆర్ఎస్ కూడా పార్లమెంట్ ప్రత్యేక సమావేశాలపై చర్చించడానికి సమావేశమవుతోంది. బీఆర్ఎస్ పార్లమెంటరీ పార్టీ మీటింగ్ లో పార్లమెంట్ లో అనుసరించాల్సిన వ్యూహాలపై చర్చిస్తారు. ఈ మీటింగ్ లో లోక్ సభ, రాజ్యసభ ఎంపీలకు సీఎం కేసీఆర్ దిశానిర్దేశం చేస్తారు.