హైదరాబాద్ వేదికగా బయో ఏషియా 2024.. థీమ్, డేట్స్ వెల్లడించిన మంత్రి కేటీఆర్

హైదరాబాద్ వేదికగా నిర్వహించనున్న బయో ఏషియా 2024 సదస్సు తేదీలు, థీమ్‌ను రాష్ట్ర ఐటీ, పరిశ్రమలు, మున్సిపల్ శాఖ మంత్రి కేటీఆర్ ప్రకటించారు. ప్రతీ ఏడాది ప్రతిష్టాత్మకంగా నిర్వహిస్తున్న ఈ సదస్సు.. 2024లో ఫిబ్రవరి 26 నుంచి 28 వరకు జరుపనున్నట్లు మంత్రి కేటీఆర్ వెల్లడించారు. ఈ సారి బయో ఏషియా కోసం డాటా అండ్ ఏఐ- రీడిఫైనింగ్ పాసిబిలిటీస్ అనే థీమ్‌ను ఎంపిక చేశారు. హైదరాబాద్ వేదికగా ప్రతీ ఏడాది నిర్వహిస్తున్న బయో ఏషియా సదస్సుకు ఏన్నో దేశాల నుంచి ప్రతినిధులు హాజరవుతున్నారు. ఈ సారి కూడా ఈ సదస్సుకు మంచి ఆదరణ లభిస్తుందని తెలంగాణ ప్రభుత్వం భావిస్తున్నది.

బయో ఏషియా-2024కు సంబంధించిన వివరాలను ఎక్స్ (ట్విట్టర్)లో వెల్లడిస్తూ.. టెక్నాలజీని బయాలజీ, డేటా సైన్స్‌ను లైఫ్ సైన్సెస్ కలిసే ప్రదేశమే హైదరాబాద్ అని పేర్కొన్నారు. 21వ బయో ఏషియా సదస్సు కోసం డాటా అండ్ ఏఐ - రీడిఫైనింగ్ పాసిబిలిటీస్ అనే థీమ్ ఎంపిక చేసినట్లు ఎక్స్‌లో తెలిపారు. డేటా ఆధారిత టెక్నాలజీ, ఆర్టిఫిషియల్ ఇంటిలిజెన్స్ రాబోయే రోజుల్లో హెల్త్ కేర్, ఫార్మాస్యుటికల్స్, బయో టెక్నాలజీలో ఎంత కీలక పాత్ర పోషించబోతున్నాయో ఈ సదస్సులో చర్చించనున్నారు. బయో ఏషియా-2024 లోగోను ఈ సందర్భంగా విడుదల చేశారు.

హెచ్ఐసీసీ వేదికగా ఈ ఏడాది ఫిబ్రవరి 24 నుంచి 26 వరకు 20వ బయో ఏషియా సదస్సు నిర్వహించారు. ఇందులో మానవీయ ఆరోగ్య పరిరక్షణలో భవిష్యత్ తరానికి మార్గదర్శనం అనే థీమ్‌తో నిర్వహించిన ఈ సదస్సులో 50 దేశాల నుంచి 5,600 మంది ప్రభుత్వ ప్రముఖఉలు, పరిశ్రమల అధిపతులు, పరిశోధకులు, వ్యవస్థాపకులు, శాస్త్రవేత్తలు, ఇతర ప్రతినిధులు పాల్గొన్నారు. ఈ సారి కూడా దాదాపు 6వేల మంది ప్రతినిధులు సదస్సుకు హాజరవుతారని ప్రభుత్వం అంచనా వేస్తోంది.