కేంద్రంలో తృతీయ ఫ్రంట్‌కి ఛాన్స్‌.. - కేసీఆర్‌ నాయకత్వం వహించాలంటున్న ఓవైసీ
దళితులు, ఓబీసీలకు రిజర్వేషన్లు పెంచాలని చెబుతున్న కాంగ్రెస్‌ వర్కింగ్‌ కమిటీ.. ముస్లింల గురించి ఎందుకు మాట్లాడటం లేదని ఓవైసీ ప్రశ్నించారు.
ప్రస్తుత రాజకీయ పరిణామాలను గమనిస్తుంటే కేంద్రంలో తృతీయ ఫ్రంట్‌కే బలమైన అవకాశాలున్నాయని ఎంఐఎం అధినేత అసదుద్దీన్ ఓవైసీ తెలిపారు. ఆదివారం ఆయన ఒక ఇంగ్లిష్‌ ఛానల్‌తో మాట్లాడుతూ పైవిధంగా స్పందించారు. ఈ తృతీయ ఫ్రంట్‌కు తెలంగాణ ముఖ్యమంత్రి, బీఆర్‌ఎస్‌ అధినేత కేసీఆర్‌ నాయకత్వం వహించాలని ఈ సందర్భంగా ఆయన తన అభిప్రాయం వ్యక్తం చేశారు. ప్రస్తుతం దేశంలో అధికార, ప్రతిపక్ష కూటముల్లో ప్రాంతీయంగా పట్టున్న చాలా పార్టీలు భాగస్వాములుగా లేవని ఈ సందర్భంగా ఓవైసీ గుర్తుచేశారు. ఆ జాబితాలో మాయావతి, కేసీఆర్‌ కూడా ఉన్నట్టు తెలిపారు. ఈ నేపథ్యంలో కేసీఆర్‌ ఈ విషయంలో చొరవ తీసుకుంటారని ఆశిస్తున్నానని ఓవైసీ చెప్పారు.
దళితులు, ఓబీసీలకు రిజర్వేషన్లు పెంచాలని చెబుతున్న కాంగ్రెస్‌ వర్కింగ్‌ కమిటీ.. ముస్లింల గురించి ఎందుకు మాట్లాడటం లేదని ఓవైసీ ప్రశ్నించారు. మహారాష్ట్రలో ముస్లిం రిజర్వేషన్ల గురించి ఎందుకు మాట్లాడటం లేదని నిలదీశారు. ఈ విషయాన్ని పార్లమెంటులో తాను లేవనెత్తానని గుర్తుచేశారు. రాజస్థాన్, ఛత్తీస్‌గఢ్‌లో మైనారిటీలకు కాంగ్రెస్‌ ఏం చేసిందని ఆయన ప్రశ్నించారు.
తెలంగాణలో ముస్లింలు అత్యంత సురక్షితంగా ఉన్నారని అసదుద్దీన్ ఈ సందర్భంగా తెలిపారు. ఇక్కడ ఆర్థిక వ్యవస్థ కూడా బలంగా ఉందని చెప్పారు. ఓ పక్క కశ్మీర్‌ లో ఎన్‌ కౌంటర్లు జరుగుతున్న సమయంలో ప్రపంచకప్‌ లో భారత్‌ క్రికెట్‌ జట్టు పాక్‌ తో తలపడటంపై కేంద్రంలోని బీజేపీని ఆయన తప్పుపట్టారు. మనం ఓ సైనికుడిని, కల్నల్‌ను, మేజర్‌ను కోల్పోయామని గుర్తుచేశారు. ఈ సమయంలో బీజేపీ ప్రతిపక్షంలో ఉంటే భిన్నంగా స్పందించేదని ఆయన చెప్పారు.
