కొంగ, మనిషి స్నేహం.. వైరలవుతున్న వీడియో

సోషల్ మీడియాలో ఇప్పుడు ఒక వీడియో తెగ వైరల్ అవుతుంది. వీడియోలోని వింతను చూసి అంతా ఆశ్చర్యపోతున్నారు. ఆ వీడియోలోని వింత ఏమిటంటే.. కొంగ మనిషితో స్నేహం చేయడం. పక్షుల్లో పావురాలు, కోళ్లు మనిషితో స్నేహం చేయడం మామూలే. అయితే కొంగలు కూడా స్నేహం చేస్తాయని తాజా ఉదంతం రుజువు చేస్తోంది.

ఓ కొంగ ప్రాణాలతో కొట్టుమిట్టాడుతుండటం చూసిన యువకుడు దానిని కాపాడాడు. అప్పట్నుంచి ఆ కొంగ యువకుడిని వదల్లేదు. అతడు ఎక్కడికి వెళ్లినా వెంట వెళుతోంది. చివరికి అతడు బైక్ పై వెళ్తున్నా వాహనాన్ని ఫాలో అవుతోంది. కొంగ, మనిషి మధ్య ఏర్పడ్డ స్నేహాన్ని చూసి అందరూ ఆశ్చర్యపోతున్నారు.

ఉత్తరప్రదేశ్ రాష్ట్రం అమేథికి చెందిన ఆరిఫ్ ఓ రోజు పొలం వద్దకు వెళ్లగా అతడికి గాయపడిన ఒక భారీ కొంగ కనిపించింది. దీంతో అతడు ఆ కొంగను ఇంటికి తీసుకెళ్లాడు. దాని ఆరోగ్యం బాగయ్యేంతవరకు సపర్యలు చేస్తూ వచ్చాడు. నిదానంగా ఆ కొంగ కోలుకుంది. ఇక ఆ కొంగ ఎగిరిపోతుందని ఆరిఫ్ భావించాడు. అయితే ఆ కొంగ ఇల్లు విడిచి వెళ్ళలేదు. ఆరిఫ్ ఎక్కడికి వెళ్ళినా సరే అతడి వెంట వెళ్లడం ప్రారంభించింది. కొంగ, యువకుడి మధ్య ఏర్పడ్డ బంధంపై కొందరు వీడియో తీశారు. ఆ వీడియోను ఐఏఎస్ అధికారి అవనీష్ శరణ్ సోషల్ మీడియాలో షేర్ చేయగా, అది ప్రస్తుతం విపరీతంగా వైరల్ అవుతోంది.