ప్రపంచంలోనే అతి పెద్ద గంట.. అచ్చు తెరుస్తుండగా ప్రమాదం.. ఇద్దరు మృతి

ఒక్కోసారి ప్రమాదం ఎలా జరుగుతుందో ఎవరూ ఊహించలేరు. రాజస్థాన్‌లో జరిగిన ఘ‌ట‌న‌ ఇద్దరి ప్రాణాలు బలి తీసుకుంది. కోటా జిల్లాలో చంబల్ రివర్ ఫ్రంట్‌లో ఆ రాష్ట్ర ప్రభుత్వం ప్రపంచంలోనే అతిపెద్ద గంటను బిగించడానికి నిర్ణయించింది. ఈ నది ముందు భాగంలో 80,000 కిలోల బరువున్న గంటను ఏర్పాటు చేయటానికి రంగం సిద్ధం చేశారు. దీని శబ్దం 8 కిలోమీటర్ల దూరం వరకు వినబడుతుంది. అలాగే ఇది 5000 సంవత్సరాల వరకు చెక్కుచెదరకుండా ఉంటుందని, ప్రపంచంలోనే అతి పెద్ద గంట అని ప్రకటించారు. అయితే గంటను అచ్చు నుంచి బయటికి తీస్తుండగా ప్రమాదం జరిగింది. గంట పైనుంచి పైన ఉన్న ఓ ఇంజినీర్ సహా మరో కార్మికుడు కిందపడ్డారు. కార్మికుడు అక్కడికక్కడే ప్రాణాలు కోల్పోగా.. ఆ ఇంజినీర్ ఆస్పత్రికి త‌ర‌లిస్తుండ‌గా మరణించాడు.

కోచింగ్ సెంటర్‌లకు పేరెన్నికగల కోటాను సుందరంగా తయారు చేసే ప్రక్రియలో భాగంగా ఇటీవలే చంబల్‌ రివర్‌ ఫ్రంట్‌ను నిర్మించారు. దీనిని రాజస్థాన్ సీఎం అశోక్‌ గెహ్లాట్‌ ఆర్భాటంగా ప్రారంభించారు. ఈ ప్రారంభోత్సవానికి రాష్ట్ర మంత్రివర్గం అంతా తరలివచ్చింది. ప్రత్యేక సాంకేతిక పరిజ్ఞానంతో ఈ గంటను తయారు చేశారు. దీనిని విడతాలవారీగా ఒక్కో దగ్గరికి మారుస్తూ చివరి అంకానికి చేరుకున్నారు. ఈ సమయంలోనే గంటను అచ్చు పెట్టె నుంచి తియ్యడానికి 35 అడుగుల పైకెక్కిన ఇంజినీర్ దేవేంద్ర ఆర్య, మ‌రో కార్మికుడు అక్కడినుంచి జారి కింద పడిపోయారు.

ఈ ఘటనలో ఒక కార్మికుడు అక్కడికక్కడే చనిపోగా.. దేవేంద్రను ఆస్ప‌త్రికి తరలించేలోపే మరణించాడు. సమాచారం అందిన వెంటనే అధికార యంత్రాంగం రంగంలోకి దిగింది. ఇద్దరి మృతదేహాలను పోస్టుమార్టం నిమిత్తం ఎంబీఎస్‌ ఆస్పత్రి మార్చురీకి తరలించారు. కేసు నమోదు చేసుకున్న పోలీసులు దర్యాప్తు చేపట్టారు.