మన్ కీ బాత్ వినలేదని విద్యార్థులకు రూ.100 జరిమానా
గత నెల 30వ తేదీన ప్రధాని మోడీ మన్ కీ బాత్ కార్యక్రమాన్ని జీఆర్డీ నిరంజనాపూర్ అకాడమీ స్కూలులో ప్రసారం చేశారు. అయితే ఆరోజు ఆదివారం కావడంతో చాలామంది విద్యార్థులు ఈ కార్యక్రమానికి గైర్హాజరయ్యారు.
ప్రధానమంత్రి నరేంద్ర మోడీ ప్రతినెల చివరి ఆదివారం ఆకాశవాణి ద్వారా మన్ కీ బాత్ కార్యక్రమం నిర్వహిస్తున్న సంగతి తెలిసిందే. గత నెల 30వ తేదీన ఈ కార్యక్రమం 100వ ఎపిసోడ్ ప్రసారం అయ్యింది. అయితే మోడీ ప్రసంగం వినలేదని డెహ్రాడూన్ లోని జీఆర్డీ నిరంజనాపూర్ అకాడమీ స్కూలు విద్యార్థులకు రూ. 100 జరిమానా విధించింది. దీంతో విద్యార్థుల తల్లిదండ్రులు ఈ విషయమై విద్యార్థుల హక్కుల జాతీయ సంఘాన్ని ఆశ్రయించారు.
గత నెల 30వ తేదీన ప్రధాని మోడీ మన్ కీ బాత్ కార్యక్రమాన్ని జీఆర్డీ నిరంజనాపూర్ అకాడమీ స్కూలులో ప్రసారం చేశారు. అయితే ఆరోజు ఆదివారం కావడంతో చాలామంది విద్యార్థులు ఈ కార్యక్రమానికి గైర్హాజరయ్యారు. దీంతో ప్రధాని స్పీచ్ వినని విద్యార్థులు రూ. వంద చొప్పున జరిమానా చెల్లించాలని స్కూలు యాజమాన్యం పాఠశాల వాట్సప్ గ్రూప్ లో నోటీసు పంపింది. ఒకవేళ జరిమానా చెల్లించకపోతే మెడికల్ సర్టిఫికెట్ సమర్పించాలన్నారు.
ఈ నోటీస్ చూసిన విద్యార్థులు, వారి తల్లిదండ్రులు ఆశ్చర్యపోయారు. ఈ విషయాన్ని వారు విద్యార్థుల హక్కుల జాతీయ సంఘ నేతల దృష్టికి తీసుకువెళ్లారు. పాఠశాల యాజమాన్యం స్కూల్ వాట్సప్ గ్రూపులో విద్యార్థులకు నోటీసు పంపిందని స్క్రీన్ షాట్లను ఆధారంగా చూపారు. దీంతో స్పందించిన ఆ సంఘ అధ్యక్షుడు ఆరిఫ్ ఖాన్ విషయాన్ని తెలియజేస్తూ డెహ్రాడూన్ ముఖ్య విద్యాధికారికి ఒక లేఖ రాశారు. మన్ కీ బాత్ కి హాజరు కాలేదని జరిమానా విధించిన పాఠశాల యాజమాన్యంపై తగిన చర్యలు తీసుకోవాలని ఆయన ఆ లేఖలో కోరారు.
దీనిపై తాజాగా ముఖ్య విద్యాధికారి స్పందించారు. ఈ ఘటనకు సంబంధించి జీఆర్డీ నిరంజనాపూర్ అకాడమీ స్కూలుకు షోకాజ్ నోటీసు జారీ చేశారు. మూడు రోజుల్లోగా పాఠశాల యాజమాన్యం సరైన వివరణ ఇవ్వకపోతే విద్యార్థుల నుంచి డబ్బు వసూలు చేసినట్టు భావించి శాఖ పరమైన చర్యలు తీసుకుంటామని ఆ నోటీసులో పేర్కొన్నారు.
