రిఫ్రిజిరేటర్‌ పేలి ఆరుగురు మృతి
పంజాబ్‌లోని జలంధర్‌ జిల్లాలో ఈ విషాద ఘటన చోటుచేసుకుంది. ఆదివారం రాత్రి రిఫ్రిజిరేటర్‌ కంప్రెషర్‌ పేలి ఒకే కుటుంబానికి చెందిన ఆరుగురు మృతిచెందారు.
అది ఆదివారం.. అందరూ ఇంటివద్దే ఉన్నారు.. అంతేకాదు, కాలక్షేపం కోసం అందరూ కలిసి టీవీ చూస్తూ ఎంజాయ్‌ చేస్తున్నారు. ఇంతలోనే ఒక్కసారిగా భారీ పేలుడు. ఆ వెంటనే మంటలు చెలరేగి.. శరవేగంగా ఇల్లు అంతా అలుముకున్నాయి. ఏం జరుగుతోందో అర్థమయ్యేలోపు జరగాల్సిన నష్టం జరిగిపోయింది. తప్పించుకోవడానికి కూడా అవకాశం లేకపోవడంతో ఐదుగురు అక్కడికక్కడే మృతిచెందారు. మరొకరు ఆస్పత్రిలో చికిత్స పొందుతూ ప్రాణాలొదిలారు.
పంజాబ్‌లోని జలంధర్‌ జిల్లాలో ఈ విషాద ఘటన చోటుచేసుకుంది. ఆదివారం రాత్రి రిఫ్రిజిరేటర్‌ కంప్రెషర్‌ పేలి ఒకే కుటుంబానికి చెందిన ఆరుగురు మృతిచెందారు. ఈ ఘటనలో మృతిచెందినవారిలో ముగ్గురు చిన్నారులు కూడా ఉన్నారు.
ఇంట్లో ఉన్న కుటుంబ సభ్యులందరూ కలసి ఆదివారం రాత్రి టీవీ చూస్తుండగా పెద్ద శబ్దంతో ఈ పేలుడు సంభవించింది. ఆ తర్వాత మంటలు చెలరేగాయి. ఆ సమయంలో ఇంట్లో ఉన్న యశేపాల్‌ గాయ్‌ (70), ఆయన కుమారుడు ఇంద్రపాల్‌ (41), కోడలు రుచి గాయ్‌ (40), వారి 14, 12, 10ఏళ్లలోపు వయసున్న ముగ్గురు చిన్నారులు మానస, దియా, అక్షయ్‌ మృతిచెందారు.
ఈ ప్రమాదంలో ఘటనాస్థలిలోనే ఐదుగురు ప్రాణాలు కోల్పోగా.. తీవ్రంగా గాయపడిన ఇంద్రపాల్‌ సోమవారం నాడు చికిత్స పొందుతూ ఆస్పత్రిలో మరణించారు. పేలుడుకు గల అసలు కారణం తెలుసుకునేందుకు ఫోరెన్సిక్‌ బృందం ఘటనా స్థలికి చేరుకుని శాంపిళ్లను సేకరించిందని పోలీసులు తెలిపారు.
