నిర్మాణ దశలోనే కూలిన రైల్వే వంతెన..17 మంది మృతి

మిజోరంలో నిర్మాణంలో ఉన్న ఓ రైల్వే వంతెన కుప్పకూలిన సంఘటనలో 17 మంది అక్కడికక్కడే మృతి చెందారు. సగానికంటే ఎక్కువమంది ఆచూకీ తెలియకపోవడంతో రెస్క్యూ ఆపరేషన్ కొనసాగుతోంది. ఈ ఘోర ప్రమాదంపై ప్రధాని మోడీ తక్షణం స్పందించారు. మరణించిన వారి కుటుంబాలకు ప్రధానమంత్రి జాతీయ సహాయ నిధి నుండి రూ.2 లక్షల ఎక్స్ గ్రేషియా ప్రకటించారు. క్షతగాత్రులకు రూ.50,000 అందజేయనున్నారు.

నిర్మాణంలో ఉన్న ఓ రైల్వే బ్రిడ్జి కూలిపోవడంతో మిజోరంలో విషాదం చోటు చేసుకుంది. మిజోరంలోని ఐజ్వాల్‌కు 20 కిలోమీటర్ల దూరంలో ఉన్న సాయిరాంగ్ ప్రాంతంలో రైల్వే వంతెన నిర్మాణం జరుగుతోంది. దేశంలోని ఇతర ప్రాంతాలతో మిజోరం రాజధాని ఇజ్వాల్ ను కలిపేందుకు 51.38 కిలోమీటర్ల దూరం ఓ కొత్త రైలు మార్గాన్ని నిర్మిస్తున్నారు. దీనికి సంబంధించే ఈ బ్రిడ్జి నిర్మాణం చేపట్టారు. ఉదయం 10 గంటల ప్రాంతంలో 35 నుంచి 40 మంది కార్మికులు పనిలో ఉండగా ఈ బ్రిడ్జి ఒక్కసారిగా కూలిపోయింది. ఈ దుర్ఘటనలో 17 మంది కార్మికులు మృతిచెందారు. మిగతా కార్మికులు ఆచూకీ దొరకకపోవడంతో వంతెన వద్ద రెస్క్యూ ఆపరేషన్ కొనసాగుతోంది. వారు బ్రిడ్జి శిథిలాల క్రింద చిక్కుకుపోయినట్టు భావిస్తున్నారు.

ఈ దుర్ఘటనపై మిజోరం సీఎం జోరంతంగ స్పందించారు. మృతుల కుటుంబాలకు ప్రగాఢ సానుభూతి తెలిపారు. గాయపడిన వారు త్వరగా కోలుకోవాలని కోరుకుంటున్నట్టు ట్విట్టర్ అకౌంట్ ద్వారా తెలియజేశారు. రెస్క్యూ ఆపరేషన్‌లో సహాయపడటానికి పెద్ద సంఖ్యలో వచ్చిన ప్రజలకు కృతజ్ఞతలు చెప్పారు. మరోవైపు ఈ ఘటనపై ప్రధాని నరేంద్ర మోడీ తీవ్ర దిగ్భ్రాంతి వ్యక్తం చేశారు. మరణించిన వారిక కుటుంబాలకు రూ.2 లక్షల ఎక్స్ గ్రేషియా, క్షతగాత్రులకు రూ.50,000 అందజేయనున్నారు. ఈ మేరకు PMO ట్విట్టర్లో అకౌంట్ నుంచి సమాచారం విడుదల చేశారు.

*