సైబ‌ర్ నేర‌గాళ్ల ఉచ్చులో బ్యాంక్ సీనియ‌ర్ మేనేజ‌ర్‌.. - రూ.90 వేలు క‌ళ్ల‌ముందే మాయం
ఆ వ్య‌క్తి మాట‌ల‌తో ఆ యాప్‌లోకి వెళ్లి బ్యాంకు ఉద్యోగిని.. త‌న యూజ‌ర్ ఐడీ, పాస్‌వ‌ర్డ్ కూడా న‌మోదు చేసింది. అంతే.. ఆమె ఫోన్‌పై ఆమెకు నియంత్ర‌ణ లేకుండా పోయింది. అది హ్యాక్ అయింది.
ఆమె ఓ బ్యాంకులో సీనియ‌ర్ మేనేజ‌ర్‌. అయినా సైబ‌ర్ నేర‌గాళ్ల ఉచ్చులో ప‌డ్డారు. ఆమె క‌ళ్ల‌ముందే.. రూ.90 వేలు రెండు విడ‌త‌ల్లో మాయ‌మ‌య్యాయి. దీంతో అవాక్క‌వ‌డం ఆమె వంత‌యింది. ఢిల్లీలో జ‌రిగిన ఈ ఘ‌ట‌న‌కు సంబంధించి అక్క‌డి పోలీసులు తెలిపిన వివ‌రాలు ఇలా ఉన్నాయి.
ఒక థాలీ కొంటే.. మ‌రో థాలీ ఫ్రీ అనే ఆఫ‌ర్ ఆమె ఫేస్‌బుక్ పోస్ట్ ద్వారా తెలుసుకుంది. ఆ వివ‌రాలు తెలుసుకునేందుకు ఆ సైట్‌లోకి వెళ్లి.. అందులో ఉన్న ఫోన్ నంబ‌ర్‌కు కాల్ చేసింది. ఆమె కాల్‌కు ఎలాంటి స్పంద‌నా రాలేదు. అయితే.. ఆ త‌ర్వాత ఆమెకు ఆ నంబ‌ర్ నుంచి కాల్ వ‌చ్చింది. ఒక ప్రముఖ రెస్టారెంట్ నుంచి అద‌నంగా థాలీ పొంద‌వ‌చ్చ‌ని ఆ ఆఫ‌ర్ వివ‌రాల‌ను అవ‌త‌లి వ్య‌క్తి వివ‌రించారు. ఆ త‌ర్వాత ఒక లింక్ ని ఫోన్ ద్వారా షేర్ చేశారు. దాని ద్వారా యాప్ డౌన్‌లోడ్ చేసుకొని ఆఫ‌ర్ పొంద‌వ‌చ్చ‌ని చెప్పారు. అందుకోసం ముందుగా రిజిస్టర్ కావాలన్నారు.
ఆ వ్య‌క్తి మాట‌ల‌తో ఆ యాప్‌లోకి వెళ్లి బ్యాంకు ఉద్యోగిని.. త‌న యూజ‌ర్ ఐడీ, పాస్‌వ‌ర్డ్ కూడా న‌మోదు చేసింది. అంతే.. ఆమె ఫోన్‌పై ఆమెకు నియంత్ర‌ణ లేకుండా పోయింది. అది హ్యాక్ అయింది. వెంట‌నే రూ.40 వేలు, ఆ త‌ర్వాత రూ.50 వేలు డెబిట్ అయ్యాయ‌ని వ‌రుస‌గా మెసేజ్‌లు వ‌చ్చాయి. వెంట‌నే కంగారుప‌డిన ఆమె త‌న క్రెడిట్ కార్డును బ్లాక్ చేసింది. డ‌బ్బును తొలుత త‌న క్రెడిట్ కార్డు నుంచి త‌న పేటీఎం ఖాతాకు, ఆ త‌ర్వాత న‌కిలీ ఖాతాకు బ‌దిలీ చేశార‌ని బాధితురాలు పోలీసుల‌కు ఇచ్చిన ఫిర్యాదులో వివ‌రించింది. ఒకవైపు ఈ కేసు దర్యాప్తు జరుగుతున్న సమయంలోనే .. వేరే నగరాల్లో ఇలాంటి కేసులు నమోదయ్యాయని పోలీసులు తెలిపారు.
ఈ ఘ‌ట‌న‌పై ఆ ప్రముఖ రెస్టారెంట్ ప్రతినిధిని సంప్రదించగా.. ఈ మోసపూరిత ప్రకటన గురించి త‌మ‌కు ప్రజల నుంచి చాలా కాల్స్ వచ్చాయని, తాము అలాంటి ఆఫర్లు ఏమీ ప్రకటించలేదని తెలిపారు. దీనిపై అందరూ అప్రమత్తంగా ఉండాలని సూచించారు. ఈ సంద‌ర్భంగా సైబ‌ర్ క్రైమ్ విభాగం అధికారులు స్పందిస్తూ.. ప్ర‌జ‌లు సైబ‌ర్ నేర‌గాళ్ల విష‌యంలో చాలా అప్రమత్తంగా ఉండాలని సూచించారు. నిరంత‌రం వేర్వేరు మార్గాల ద్వారా ప్ర‌జ‌ల‌ను మోస‌గించాల‌ని సైబ‌ర్ నేర‌స్తులు చూస్తున్నార‌ని, ప్ర‌జ‌లు అప్రమత్తంగా ఉండాలని సైబ‌ర్ క్రైమ్ పోలీసులు హెచ్చ‌రించారు.
