టెస్టింగ్ టైమ్‌లోనే పేలిపోయిన జపాన్ రాకెట్
శుక్ర‌వారం ఉద‌యం జ‌రిగిన ఈ ప్ర‌మాదంలో ప్రాణ‌న‌ష్టం ఏమైనా జ‌రిగిందా అనే విష‌యంలో ఇప్ప‌టివ‌ర‌కు స‌మాచారం లేదని జపాన్ ఏరోస్పేస్ ఏజెన్సీ అధికారులు తెలిపారు.
ప్రపంచంలోనే అతి భారీ అంతరిక్ష కార్యక్రమాలు నిర్వహించే దేశాల్లో ఒక‌టైన జపాన్‌కు భారీ ఎదురు దెబ్బ తగిలింది. జపాన్ ఏరోస్పేస్ సంస్థ అభివృద్ధి చేస్తున్న రాకెట్.. ఇంజిన్ ప‌రీక్ష‌ల స‌మ‌యంలోనే పేలిపోయింది. ఈ ప్ర‌మాద స‌మాచారాన్ని జపాన్ స్పేస్ ఏజెన్సీ వెల్ల‌డించింది. శుక్ర‌వారం ఉద‌యం జ‌రిగిన ఈ ప్ర‌మాదంలో ప్రాణ‌న‌ష్టం ఏమైనా జ‌రిగిందా అనే విష‌యంలో ఇప్ప‌టివ‌ర‌కు స‌మాచారం లేదని జపాన్ ఏరోస్పేస్ ఏజెన్సీ అధికారులు తెలిపారు.
గతంలో ఉపయోగించిన ఎప్సిలాన్ రాకెట్‌ను అభివృద్ధి చేసి `ది ఎప్సిలాన్-ఎస్` ( Epsilon S) పేరిట జపాన్ సిద్ధం చేసింది. తాజాగా అదే ప్రమాదానికి గురైంది. గత అక్టోబర్‌లో ఘన ఇంధనం ఆధారంగా పనిచేసే ఎప్సిలాన్ రాకెట్‌ను జపాన్ ప్రయోగించింది. అప్పట్లో ఆ ప్రయోగం విఫలమైంది. తాజా మార్పులతో పరీక్షించగా.. ప్రయోగం మొదలైన 50 సెకన్లలోనే విఫలమైంది. ఈ పరీక్షా కేంద్రం ఉత్తర ఆకితా ప్రాంతంలో ఉంది. ఈ ప్రాంతం భారీ ఎత్తున మంటలు, పొగలతో నిండిపోయింది. దీనికి సంబంధించిన చిత్రాలను జాతీయ మీడియా సంస్థ ప్రసారం చేసింది.
