చాట్ జీపీటీ ద్వారా ఫేక్ న్యూస్... ప్రపంచంలోనే మొదటి అరెస్ట్

ఈ మధ్య కాలంలో ఏఐ ఆధారిత చాట్ జీపీటీపై జరుగుతున్నంతగా చర్చ ప్రపంచంలో మరే అంశంపై జరగకపోవచ్చు. చాట్ జీపీటీ ప్రపంచ టెక్నాలజీ రంగానే మార్చేసిందని, ఇదొక అద్భుతమైన ఆవిష్కరణ అని కొందరు వాదిస్తూ ఉంటే దీని వల్ల ప్రజలు ఉపాధి,ఉద్యోగాలు కోల్పోతారని, కొన్ని ప్రమాదకర ప‌రిణామాలు కూడా సంభవిస్తాయని మరికొన్ని వాదనలు వస్తున్నాయి. ఈ నేపథ్యంలో మొదటి సారి చాట్ జీపీటీ ఆధారంగా ఓ ఫేక్ న్యూస్ ను ప్రచారంలో పెట్టిన వ్యక్తి అరెస్టయిన సంఘటన సంచలనం కలిగిస్తోంది.

రైలు ప్రమాదానికి సంబంధించిన ఫేక్ న్యూస్‌ని రూపొందించి, ఆర్టిఫిషియల్ ఇంటెలిజెన్స్ టెక్నాలజీని ఉపయోగించి ఆన్‌లైన్‌లో సమాచారం రూపొందించి దాన్ని అనేక‌ ఖాతాలలో పోస్ట్ చేసినందుకు చైనా పోలీసులు ఒక వ్యక్తిని అదుపులోకి తీసుకున్నారు, ఇది చాట్‌ జిపిటిని దుర్వినియోగం చేసినందుకు చైనా చేసిన మొదటి అరెస్టుగా నివేదించబడింది.

వాయువ్య గన్సు ప్రావిన్స్‌లోని పోలీసులు ఆదివారం మాట్లాడుతూ హాంగ్ అనే అనుమానితుడిని కృత్రిమ మేధస్సు సాంకేతికతను ఉపయోగించి తప్పుడు, అసత్య సమాచారాన్ని రూపొందించినందుకు అదుపులోకి తీసుకున్నట్లు తెలిపారు.

ఏప్రిల్ 25న జరిగిన లోకల్ రైలు ప్రమాదంలో తొమ్మిది మంది మృతి చెందారని ఒక నకిలీ వార్తా కథనాన్నిహాంగ్ ప్రచారంలో పెట్టాడు.

చైనీస్ సెర్చ్ ఇంజన్ దిగ్గజం బైడు నిర్వహిస్తున్న బ్లాగ్ ప్లాట్‌ఫారమ్ అయిన బైజియాహావోలో 20 కంటే ఎక్కువ ఖాతాల ద్వారా ఏకకాలంలో పోస్ట్ చేసిన కథనాన్ని కాంగ్‌టాంగ్ కౌంటీలోని సైబర్ సెక్యూరిటీ అధికారులు కనుగొన్నారు.

ఈ కథనాలు అధికారుల దృష్టికి వచ్చే సమయానికి 15,000 కంటే ఎక్కువ క్లిక్‌లు వచ్చాయి.

గన్సు పబ్లిక్ సెక్యూరిటీ డిపార్ట్‌మెంట్, హాంగ్ కావాలనే తప్పుడు వార్తను సృష్టించి సమాజంలో భయాందోళనలు సృష్టించడానికి చాట్ జీపీటీ ను ఉపయోగించాడని పేర్కొంది.

హంగ్ కొంత కాలంగా చైనాలో ట్రెండింగ్ అవుతున్న సామాజిక కథనాల అంశాలను ChatGPTలోకి ఇన్‌పుట్ చేసి, అదే నకిలీ కథనానికి సంబంధించిన విభిన్న వెర్షన్‌లను త్వరగా రూపొందించి, వాటిని తన బైజియాహావో ఖాతాల్లో అప్‌లోడ్ చేసాడు.

ChatGPT చైనాలో నిషేధం అయినప్పటికీ VPN కనెక్షన్ ను మార్చి చాట్ జీపీటీని యాక్సెస్ చేయవచ్చు.

ChatGPT ఇటీవలి నెలల్లో వైరల్‌గా మారినందున, దాని సాంకేతికత గురించి చైనా పదేపదే అనుమానాలు, హెచ్చరికలు కూడా చేస్తున్నది.

చాట్‌జిపిటి ద్వారా ఉత్పన్నమయ్యే పుకార్ల పట్ల జాగ్రత్తగా ఉండాలని బీజింగ్‌లోని పోలీసులు ప్రజలను హెచ్చరించారు.