దీపావళికి దమ్మీ

యంగ్ హీరో విశ్వక్ సేన్, ఫలక్‌నుమా దాస్‌ మూవీతో తన దర్శకత్వ ప్రతిభని నిరూపించుకున్నాడు. హీరోగా ప్రధాన పాత్రలో నటించడంతో పాటు,.. దర్శకత్వం కూడా చేసి పెద్ద విజయాన్ని అందుకున్నాడు. ఇప్పుడు మరోసారి తన స్వీయదర్శకత్వంలో, హీరోగా నటిస్తూ సినిమా చేస్తున్నాడు. ఆ మూవీ పేరు 'దాస్ కా ధమ్కీ'. వన్మయే క్రియేషన్స్, విశ్వక్ సేన్ సినిమాస్ బ్యానర్లపై కరాటే రాజు నిర్మిస్తున్న ఈ చిత్రానికి ప్రసన్న కుమార్ బెజవాడ కథ, మాటలు అందించాడు. నివేత పేతురాజ్ హీరోయిన్.

దాస్ కా ధమ్కిలో అన్నీ ఉన్నాయంటున్నాడు విశ్వక్. రొమాన్స్, కామెడీ, యాక్షన్, థ్రిల్లర్.. ఇలా అన్ని ఎలిమెంట్స్ కవర్ అవుతాయంటున్నాడు. తెలుగు ప్రేక్షకులకు తన సినిమా ఓ కొత్త అనుభూతిని ఇస్తుందట. హిలేరియస్ ఎంటర్టైన్మెంట్ తో పాటు ఇందులోని యాక్షన్ సీక్వెన్సెస్ కొత్త థ్రిల్స్‌ అందిస్తాయని చెబుతున్నాడు.

95 శాతం చిత్రీకరణ పూర్తిచేసుకుంది ఈ సినిమా. మిగిలిన భాగాన్ని ఒక వారంలో పూర్తి చేస్తారు. ఆర్‌ఆర్‌ఆర్‌, హరి హర వీర మల్లు చిత్రాలకు స్టంట్ కొరియోగ్రఫీ చేసిన బల్గేరియన్ ఫైట్ మాస్టర్స్ టోడర్ లాజరోవ్-జుజి తో చిత్ర బృందం సినిమా క్లైమాక్స్ ఫైట్‌ ను షూట్ చేస్తోంది. హైదరాబాద్‌ లోని సారధి స్టూడియోస్‌ లో వేసిన భారీ సెట్‌ లో ఈ షూటింగ్ జరుగుతోంది.

ఫుకెట్‌ లో ఒక నెల షూటింగ్ షెడ్యూల్‌ ను, స్పెయిన్‌ లో ఒక చిన్న షెడ్యూల్‌ ను టీమ్ పూర్తి చేసుకుంది. దీపావళి కి ఫస్ట్‌లుక్ పోస్టర్‌ని విడుదల చేసి ప్రమోషన్స్‌ను అధికారికంగా ప్రారంభించనున్నారు. ఈ చిత్రానికి లియోన్ జేమ్స్ సంగీతం అందిస్తున్నాడు. తెలుగు, తమిళం, కన్నడ, మలయాళం, హిందీ భాషల్లో ఈ చిత్రం విడుదల కానుంది. విశ్వక్ సేన్ కెరీర్ లో తొలి పాన్ ఇండియా సినిమా ఇదే.