Vishwak Sen | మరో సినిమా వదులుకున్న విశ్వక్ సేన్
Vishwak Sen - సీనియర్ హీరో అర్జున్ దర్శకత్వంలో చేయాల్సిన సినిమా నుంచి విశ్వక్ సేన్ తప్పుకున్న సంగతి తెలిసిందే. ఇప్పుడీ హీరో మరో పెద్ద ప్రాజెక్ట్ నుంచి తప్పుకున్నాడు.
హీరో విశ్వక్ సేన్ మరో సినిమా వదులుకున్నాడు. ఈసారి ఏకంగా చాలా పెద్ద సినిమా అని సమాచారం. ఈ విషయాన్ని అతడే రీసెంట్ గా ఓ ఇంటర్వ్యూలో బయటపెట్టాడు. తను ఎంతగానో అభిమానించే ఓ పెద్ద హీరో సినిమాలో కీలక పాత్రలో నటించే అవకాశం వచ్చిందట విశ్వక్ సేన్ కి. పారితోషికం కూడా బాగానే ఆఫర్ చేశారట.
అయితే ఆ సినిమాలో తన పాత్రపై పూర్తిస్థాయిలో విశ్వక్ సేన్ సంతృప్తి వ్యక్తం చేయలేదు. అందుకే తన అభిమాన హీరో నటించిన సినిమా అయినప్పటికీ, తిరస్కరించినట్టు వెల్లడించాడు. చిరంజీవి నటించిన వాల్తేరు వీరయ్య సినిమాలో రవితేజ పోషించిన పాత్ర ఎలా ఉంటుందో, దాదాపు ఆ స్థాయిలో తనకు కీలక పాత్ర ఆఫర్ చేశారని.. కానీ సదరు పెద్ద హీరోతో అంతకంటే మంచి సినిమా చేయాలనేది తన ఉద్దేశమని చెప్పుకొచ్చాడు విశ్వక్ సేన్.
బాలకృష్ణ-దర్శకుడు బాబి కాంబినేషన్ లో ఓ సినిమా తెరకెక్కుతోంది. ఆ మూవీలోనే కీలక పాత్ర కోసం విశ్వక్ ను సంప్రదించారని, అతడు తిరస్కరించాడనే టాక్ నడుస్తోంది. ఈ విషయాన్ని మాత్రం విశ్వక్ సేన్ వెల్లడించలేదు. విశ్వక్ కు బాలకృష్ణ అంటే ఇష్టమనే సంగతి తెలిసిందే.
ప్రస్తుతం ఈ హీరో వరుసపెట్టి సినిమాలు చేస్తున్నాడు. అతడు నటించిన గామి సినిమా విడుదలకు సిద్ధమైంది. అటు గ్యాంగ్స్ ఆఫ్ గోదావరి సినిమా షూటింగ్ చివరి దశలో ఉంది. వీటితో పాటు మరో 2 సినిమాల షూటింగ్స్ తో అతడు బిజీగా ఉన్నాడు.
