Mega 157 | యూవీ క్రియేషన్స్ బ్యానర్ పై చిరంజీవి సినిమా
UV Creations Chiranjeevi - వశిష్ఠ దర్శకత్వంలో సినిమా చేయబోతున్నారు చిరంజీవి. ఈ విషయాన్ని ఈరోజు యూవీ క్రియేషన్స్ బ్యానర్ అధికారికంగా ప్రకటించింది.
ఇది మీ ఊహకు మించి ఉంటుంది. తెలుగు చిత్ర పరిశ్రమలో ఎవర్‌గ్రీన్ క్లాసిక్స్‌లో ఒకటిగా నిలిచిన ‘జగదేక వీరుడు అతిలోక సుందరి’ లాంటి మరో ఫాంటసీ ఎంటర్‌టైనర్‌లో చిరంజీవిని చూడాలని ఉత్సాహంగా ఉన్న అభిమానులు ఈ అనౌన్స్ మెంట్ తో మరింత సంతోషిస్తారు. చాలా కాలం తర్వాత మెగాస్టార్ చిరంజీవి ఒక ఫాంటసీ మూవీకి సైన్ చేశారు.
‘బింబిసార’తో మనల్ని మరో ప్రపంచంలోకి తీసుకెళ్లిన వశిష్ట ఈ చిత్రానికి దర్శకత్వం వహించనున్నాడు. యూవీ క్రియేషన్స్ బ్యానర్ పై ఈ ప్రతిష్టాత్మక చిత్రం రాబోతోంది. కెరీర్ లో చిరంజీవికి ఇది 157వ చిత్రం. వంశీ, ప్రమోద్, విక్రమ్ నిర్మాతలు.
మెగాస్టార్ చిరంజీవి పుట్టినరోజును పురస్కరించుకుని ఈరోజు అఫీషియల్ గా ఈ సినిమాను ఎనౌన్స్ చేశారు. ప్రకటనలో భాగంగా కాన్సెప్ట్ పోస్టర్ రిలీజ్ చేశారు. భూమి, నీరు, అగ్ని, గాలి, ఆకాశం (పంచభూతాలు) నక్షత్ర ఆకారపు ఎలిమెంట్, త్రిశూలంతో ఆవరించి ఉన్నాయి. ఈ అద్భుతమైన పోస్టర్ తో సినిమా జానర్ పై క్లారిటీ ఇచ్చారు మేకర్స్.
రీసెంట్ గా భోళాశంకర్ సినిమాతో థియేటర్లలోకి వచ్చారు చిరంజీవి. ఆ సినిమా ఫలితం నిరాశపరిచింది. ఆ ప్రభావంతో, వశిష్ఠ దర్శకత్వంలో చేస్తున్న సినిమాను చిరంజీవి హోల్డ్ లో పెట్టినట్టు వార్తలొచ్చాయి. కానీ తాజా ప్రకటనతో అవన్నీ అవాస్తవాలని తేలాయి. త్వరలోనే ఈ ప్రాజెక్టుకు సంబంధించి మరిన్ని వివరాలు బయటకు రాబోతున్నాయి.
