Hanu-Man | బాలీవుడ్ లో హనుమాన్ హంగామా

హనుమాన్ సినిమా ఇలా వచ్చి అలా వెళ్లిపోయేది కాదని, చాన్నాళ్ల పాటు థియేటర్లలో కొనసాగుతుందని రిలీజ్ కు ముందు నుంచి మేకర్స్ చెబుతూనే ఉన్నారు. ఇప్పుడు అదే నిజమైంది. హనుమాన్ సినిమా రోజురోజుకు తన పరిధిని పెంచుకుంటూ పోతోంది. తెలుగు రాష్ట్రాల్లో ఈ సినిమాకు రెండో వారం మరిన్ని థియేటర్లు యాడ్ అయ్యాయి.

అటు ఉత్తరాదిన హను-మాన్ హవా కొనసాగుతోంది. ఓవైపు రామ మందిరం ప్రారంభోత్సవం కూడా ఉండడంతో, హనుమాన్ సినిమా చూసేందుకు నార్త్ ప్రేక్షకులు ఎగబడుతున్నారు. ఫలితంగా శని, ఆదివారాలు ఈ సినిమాకు మంచి వసూళ్లు వచ్చాయి. పనిలోపనిగా సినిమాకు నార్త్ లో మరిన్ని థియేటర్లు కేటాయిస్తున్నారు

బాలీవుడ్ లో హనుమాన్ సినిమాకు శనివారం 4 కోట్ల రూపాయలు, ఆదివారం 4 కోట్ల 20 లక్షల రూపాయల నెట్ వచ్చింది. తాజా వసూళ్లతో ఈ సినిమాకు ఉత్తరాదిన 30 కోట్ల రూపాయల వసూళ్లు వచ్చినట్టయింది. ఓ చిన్న సినిమాకు ఇది చాలా పెద్ద విజయం.

ఇటు తెలుగు రాష్ట్రాల్లో ఈ సినిమా డ్రీమ్ రన్ కొనసాగుతోంది. అటు ఓవర్సీస్ లో ఇప్పటికే ఆల్ టైమ్ టాప్-5 గ్రాసర్స్ లిస్ట్ లోకి చేరింది హనుమాన్. 5 మిలియన్ డాలర్లకు పైగా వసూళ్లతో దూసుకుపోతోంది. బాహుబలి-2, ఆర్ఆర్ఆర్, సలార్, బాహుబలి-1 సినిమాల తర్వాత హను-మాన్ సినిమా 5వ స్థానంలో కొనసాగుతోంది.