క్లైమాక్స్ కోసం అనుకున్న సీన్ ఇంటర్వెల్ కు వచ్చింది

ఇది పుష్ప సినిమాకు సంబంధించిన మేటర్. ఆల్రెడీ ఈ సినిమా చరిత్ర గురించి అందరికీ తెలుసు. కాకపోతే ఇప్పుడు పూరి జగన్నాధ్ స్టేట్ మెంట్ తో ఈ సినిమా మరోసారి తెరపైకొచ్చింది. పుష్ప సినిమా క్లయిమాక్స్ లో హీరో-విలన్ కూర్చొని మాట్లాడుకుంటారు. ఎలాంటి ఫైట్ ఉండదు, కేవలం పెర్ఫార్మెన్స్ మాత్రమే కనిపిస్తుంది. అలా కూర్చొని మాట్లాడుకునే క్లయిమాక్స్ తనకు బాగా నచ్చిందని చెప్పుకొచ్చాడు పూరి జగన్నాధ్.

దీంతో ఆ సన్నివేశంపై మరోసారి చర్చ మొదలైంది. తాజాగా దర్శకుడు సుకుమార్ కూడా ఆ సీన్ పై స్పందించాడు. తనకు గురువులాంటి పూరి జగన్నాధ్, ఆ సన్నివేశాన్ని మెచ్చుకోవడంపై ఆనందం వ్యక్తం చేసిన సుకుమార్.. ఆ సీన్ కు సంబంధించి ఆసక్తికర విషయాన్ని బయటపెట్టాడు. నిజానికి అది క్లయిమాక్స్ కాదంట. సినిమా ఇంటర్వెల్ సీన్ అంట.

అవును.. పుష్ప సినిమాను 2 భాగాలుగా తీయాలనే ఆలోచన చేయకముందు.. ఆ సీన్ దగ్గర ఇంటర్వెల్ బ్యాంగ్ వేసుకున్నాడట సుకుమార్. ఎప్పుడైతే సినిమా నిడివి పెరిగి, 2 భాగాలు అయిందో, అప్పుడిక స్క్రీన్ ప్లే మార్చక తప్పలేదు. దీంతో ఇంటర్వెల్ కోసం అనుకున్న ఆ సన్నివేశాన్ని, క్లయిమాక్స్ కు తీసుకొచ్చానని అసలు మేటర్ బయటపెట్టాడు సుకుమార్.

పుష్ప సినిమా ఇంటర్వెల్ లో సునీల్ కు వార్నింగ్ ఇస్తాడు అల్లు అర్జున్. దాన్ని ఇంటర్వెల్ బ్యాంగ్ గా మార్చేందుకు, ఆ సీన్ ను బాగా పొడిగించాల్సి వచ్చిందని వెల్లడించాడు.

తాజాగా పుష్ప పార్ట్-2 స్టార్ట్ అయింది. వచ్చేనెల నుంచి రెగ్యులర్ షూటింగ్ మొదలుకాబోతోంది. పుష్ప సినిమా దేశవ్యాప్తంగా హిట్టవ్వడంతో, పార్ట్-2పై అందరి దృష్టి పడింది.