రామ్ చరణ్ సరసన ఛాన్స్.. సంబంధం లేదన్న యూనిట్

రామ్ చరణ్, శంకర్ కాంబినేషన్ లో భారీ బడ్జెట్ సినిమా తెరకెక్కుతోంది. దిల్ రాజు నిర్మాతగా సినిమా షూటింగ్ శరవేగంగా జరుగుతోంది. దాదాపు 50శాతానికి పైగా షూటింగ్ కూడా పూర్తయింది. సరిగ్గా ఇలాంటి టైమ్ లో ఈ సినిమాకు సంబంధించి కాస్టింగ్ కాల్ వచ్చింది. చరణ్-శంకర్ సినిమా కోసం నూతన నటీనటులు కావాలంటూ సోషల్ మీడియాలో ఓ ప్రకటన చక్కర్లు కొడుతోంది. దీంతో చాలామంది ఔత్సాహికులు ఈ ప్రాజెక్టు కోసం పరుగులుపెట్టారు.

నిన్నట్నుంచి జరుగుతున్న ఈ ప్రచారాన్ని యూనిట్ తిప్పికొట్టింది. కాస్టింగ్ కాల్ అంటూ సోషల్ మీడియాలో చక్కర్లు కొడుతున్న ప్రచారానికి, తనకు ఎలాంటి సంబంధం లేదని స్పష్టం చేసింది. దయచేసి ఇలాంటి తప్పుడు ప్రకటనలు నమ్మి, డబ్బులు ఇచ్చి మోసపోవద్దని యూనిట్ విజ్ఞప్తి చేసింది.

చరణ్-శంకర్ సినిమాకు సంబంధించి నటీనటులను ఎంపిక చేసే బాధ్యత, అధికారం మరే ఇతర వ్యక్తికి గానీ, సంస్థకు గానీ లేదని యూనిట్ తెలిపింది. ఈ విషయంలో సర్వహక్కులు శ్రీ వెంకటేశ్వర క్రియేషన్స్ సంస్థకు మాత్రమే ఉన్నాయని, ప్రస్తుతం అధికారికంగా ఎలాంటి కాస్టింగ్ కాల్ ప్రక్రియ చేపట్టడం లేదని యూనిట్ ప్రకటించింది.

రామ్ చరణ్ హీరోగా నటిస్తున్న ఈ సినిమాలో కియరా అద్వానీ హీరోయిన్ గా నటిస్తోంది. అంజలి, సునీల్, నవీన్ చంద్ర ఇతర కీలక పాత్రలు పోషిస్తున్నారు. తమన్ ఈ సినిమాకు సంగీతం అందిస్తున్నాడు. వచ్చే ఏడాది సమ్మర్ లో ఈ సినిమాను విడుదల చేయబోతున్నారు.