ఏడాది ఒప్పందం.. 3 షోలు.. రూ. 9 కోట్లు?
జీ తెలుగులో మరోసారి బిగ్ డీల్ కుదుర్చున్నాడు మహేష్ బాబు. దీనికి సంబంధించిన కార్యక్రమం రేపు టెలికాస్ట్ అవుతుంది. ఇంతకీ ఈ డీల్ విలువ ఎంతో తెలుసా?
ఉన్నట్టుండి సడెన్ గా జీ తెలుగు టీవీ స్క్రీన్ పై ప్రత్యక్షమయ్యాడు మహేష్ బాబు. జీ తెలుగులో వస్తున్న డాన్స్ ఇండియా డాన్స్ కార్యక్రమానికి గెస్ట్ గా వచ్చాడు. తనతో పాటు తన కూతుర్ని కూడా తీసుకొచ్చాడు. ఇద్దరూ కలిసి ఆ కార్యక్రమానికి జడ్జీలుగా కూడా వ్యవహరించారు. ఆ కార్యక్రమం రేపు ప్రసారం అవుతుంది. దీనికి సంబంధించి సదరు ఛానెల్ ప్రచారాన్ని దంచికొడుతోంది.
అయితే ఈ వ్యవహారం ఇక్కడితో ముగిసిపోలేదు. ఇలా కొన్ని కార్యక్రమాల్ని ప్రచారం చేసేందుకు మహేష్ బాబు, జీ తెలుగు నుంచి ఏకంగా 9 కోట్ల రూపాయలు అందుకున్నాడట. కీలకమైన 3 కార్యక్రమాలు, 2 సీరియల్స్ లో కనిపించడంతో పాటు.. ఈ ఏడు జీ తెలుగు నిర్వహించే అవార్డుల కార్యక్రమానికి కూడా మహేష్ బాబు చీఫ్ గెస్ట్ గా హాజరుకాబోతున్నాయి. ఈ డీల్ కింద మహేష్ బాబుకు 9 కోట్ల రూపాయలు వచ్చినట్టు అనధికారిక సమాచారం.
నిజానికి జీ తెలుగులో మహేష్ ఇలా కనిపించడం కొత్తేంకాదు. గతంలో ఓ కార్యక్రమానికి గెస్ట్ గా వచ్చేందుకు మహేష్ ఇలానే జీ తెలుగు నుంచి భారీ పారితోషికం అందుకున్నాడు. అప్పట్లో ఆ కార్యక్రమం రద్దయింది. దాంతో జీ తెలుగు సీరియల్స్ ప్రచారానికి మహేష్ ను ఉపయోగించుకుంది.
ఆ అనుభవంతో ఈసారి ఏకంగా మహేష్ తో భారీ డీల్ సెట్ చేసుకుంది జీ తెలుగు. సినీతారలతో సదరు ఛానెల్ ఒప్పందాలు చేసుకోవడం కొత్తేంకాదు. మొన్నటివరకు ఈ ఛానెల్ కు కృతి శెట్టి బ్రాండ్ అంబాసిడర్ గా ఉండేది.
