Salaar | సలార్ నుంచి సూరీడే సాంగ్ రిలీజ్

పాన్ ఇండియా స్టార్ ప్ర‌భాస్ టైటిల్ పాత్ర‌లో న‌టిస్తోన్న భారీ బ‌డ్జెట్ యాక్ష‌న్ థ్రిల్ల‌ర్ ‘సలార్ పార్ట్ 1 సీజ్ ఫైర్’. హోంబ‌లే ఫిలిమ్స్ నిర్మిస్తున్న ఈ సినిమాకు ప్ర‌శాంత్ నీల్ ద‌ర్శ‌క‌ుడు. డిసెంబ‌ర్ 22న ప్ర‌పంచ వ్యాప్తంగా గ్రాండ్ రిలీజ్ అవుతుంది. రీసెంట్‌గా విడుద‌లైన ‘సలార్ పార్ట్ 1 సీజ్ ఫైర్’ ట్రైల‌ర్ సోష‌ల్ మీడియాను షేక్ చేస్తూ స‌రికొత్త రికార్డుల‌ను క్రియేట్ చేసింది. దీంతో సినిమాపై ఎక్స్‌పెక్టేష‌న్స్ పెరిగాయి. ఈ అంచనాల్ని మరింత పెంచుతూ తాజాగా ‘సూరీడే..’ అనే లిరికల్ సాంగ్‌ను విడుద‌ల చేశారు.

సూరీడే అనే సాంగ్ ఓ మాంటేజ్ సాంగ్. ప్రభాస్, పృధ్వీరాజ్ పాత్రల మధ్య స్నేహబంధాన్ని చెప్పేలా ఈ సాంగ్ తెరకెక్కింది. లిరిక్స్ వింటుంటే హృద‌యాన్ని హత్తుకునే భావోద్వేగాలు క‌నిపిస్తున్నాయి. ఇది సినిమాలో హైలెట్‌గా నిలుస్తుంద‌ని, ఒకే ఆత్మ అనేలా ఉండే ఇద్ద‌రి స్నేహితులు గురించి ఈ పాట చెబుతుంది. వారే ఒక‌రికొకరు బ‌లం.. వారే ఒక‌రికొక‌రు బ‌ల‌హీన‌త అని పాట వివ‌రిస్తుంది. ర‌వి బస్రూర్ సంగీత సార‌థ్యంలో హ‌రిణి పాడిన ఈ సాంగ్‌ను కృష్ణ‌కాంత్ రాశారు.

స‌లార్ సీజ్ ఫైర్ కేవ‌లం యాక్ష‌న్ సినిమాయే కాదు..అంత‌కు మించి ఎమోష‌న‌ల్ కంటెంట్ ఉంటుంద‌ని ఆడియెన్స్‌కి క్లియ‌ర్‌గా తెలుస్తోంది. స‌లార్ సీజ్ ఫైర్ సెన్సార్ పూర్తి చేసుకుని ఏ-స‌ర్టిఫికేట్‌ను పొందింది. 2 గంట‌ల 55 నిమిషాల వ్య‌వ‌ధితో ప్రేక్ష‌కులను అల‌రించ‌నుంది.

క్రిస్మస్ సీజన్‌లో సలార్ సినిమాను రిలీజ్ చేయడంతో ప్రేక్షకుల్లోనూ భారీ అంచనాలు నెలకొన్నాయి. ప్రభాస్ సలార్ చిత్రంలో పృథ్వీరాజ్ సుకుమారన్, శ్రుతి హాసన్, జగపతి బాబు వంటి వారు ముఖ్య పాత్రల్లో కనిపిస్తారు.