సీతారామంలో మాజీ స్టార్ హీరోయిన్

సీతారామంలో చాలామంది స్టార్ కాస్ట్ ఉన్నారు. అయితే వాళ్లు ఎవరనేది మేకర్స్ ప్రకటించే వరకు బయటకు రావడం లేదు. మొన్నటికిమొన్న సుమంత్ ఫస్ట్ లుక్ రిలీజ్ చేసి షాకిచ్చారు. ఇప్పుడు భూమిక లుక్ విడుదల చేశారు. ఫస్ట్ లుక్ రిలీజయ్యేంతవరకు ఈ సినిమాలో భూమిక ఉందనే విషయం చాలామందికి తెలియదు.

యుద్ధ నేపథ్యంలో ప్రతిష్టాత్మకంగా తెరకెక్కుతున్న లవ్ స్టొరీ 'సీతారామం'. దుల్కర్ సల్మాన్, మృణాల్ ఠాకూర్ జంటగా హను రాఘవపూడి దర్శకత్వంలో రూపుదిద్దుకుంటున్న ఈ చిత్రంలో కీలక పాత్రల కోసం ప్రముఖ నటీనటులను ఎంచుకున్నారు నిర్మాతలు. ప్రతి పాత్రను వినూత్నంగా పరిచయం చేస్తున్నారు.

అఫ్రీన్‌ పాత్రలో రష్మిక నటిస్తుండగా, బ్రిగేడియర్ విష్ణు శర్మగా సుమంత్ కనిపించనున్నారు. తాజాగా ఈ చిత్రం నుండి సీనియర్ హీరోయిన్ భూమిక చావ్లా పాత్రని మృణాళినిగా పరిచయం చేశారు. ఒక పాపని దగ్గరగా తీసుకొని బ్యూటీఫుల్ స్మైల్ తో ఫస్ట్ లుక్ లో ఆకట్టుకుంటోంది భూమిక. ఈ చిత్రంలో ఆమె బ్రిగేడియర్ విష్ణు శర్మకి భార్య పాత్రలో కనిపించనున్నారు.

వైజయంతీ మూవీస్ బ్యానర్ పై అశ్వినీ దత్ ఈ చిత్రాన్ని భారీగా నిర్మిస్తున్నారు. పిఎస్ వినోద్ సినిమాటోగ్రఫీ అందిస్తున్న ఈ చిత్రానికి విశాల్ చంద్రశేఖర్ సంగీతం అందించారు. తెలుగు, తమిళం, మలయాళ భాషల్లో ఏకకాలంలో రూపొందుతున్న ఈ చిత్రం ఆగస్ట్ 5న ప్రేక్షకుల ముందుకు వస్తోంది.