ఆమెదే రేపటి తరం
BY Telugu Global6 Feb 2023 11:28 AM GMT
X
Telugu Global Updated On: 6 Feb 2023 11:28 AM GMT
గాయం రక్తాశ్రువులై స్పర్శించినపుడు
చెమ్మగానైనా తడిమిన చెలిమి
కర్తవ్యనిర్వహణలో
కఠినశిల అయినప్పుడు
వధ్య శిలలా జీవితం
విషపుకోరలకు బలైనప్పుడు
కాలయవనికపై బ్రతుకుచిత్రం
కాలిబూడిదయినప్పుడు
అనంతంగా సాగే అపరిష్కృత
సమస్యలకి అలంబనేదీ కానరానపుడు
చేతనత్వాల వేదికేదీ చేతికందనపుడు
ఆత్మబలిదానంలో కూడా
అట్టడుగు స్వరం
ఆణువంతైనా జాలిచూపనపుడు
ఆలిగా, అమ్మగా, అత్తగా,
అడుగడుగునా
అణచివేతకు గురవుతున్నపుడు
ఆడపిల్లను ఆ.. డ..పిల్లగా
సమాజం ఛీత్కరించినపుడు
బలిదానానికి సిద్ధమవక
బ్రతుకు పోరును
బాసటగా తీసుకొని
గొంతెత్తి అడిగే స్వరం
ఆమెదే కావాలి
రంగురంగుల ఆకాశపునేత్రాలతో
రాగబంధాల రక్తిమపులుముకొని
ఆర్ద్ర సంగీత ఝరిలా
ఆమె స్వరం
రేపటి తరానికి
నాందీగీతం అవాలి..
- రెడ్డి పద్మావతి.
(పార్వతీపురం. విజయనగరం జిల్లా)
Next Story