సమాంతర రేఖలు
BY Telugu Global15 Sep 2023 6:35 AM GMT
X
Telugu Global Updated On: 15 Sep 2023 6:35 AM GMT
ఉదయాన్నే
అరుణకిరణాన్ని చూసి
మైమరచి పోతా నేను
అది ప్రతిరోజు చూసేదేగా
అంటావు నీవు
ప్రతి పువ్వునూ పలకరిస్తానేను
వాటికి మాటలొస్తాయా
అంటావు నీవు
వానలో తడవడం నాకిష్టం
జలుబు చేస్తుంది వద్దంటావు
వెన్నెల్లో ఆకాశం వైపు
చూడటం నాకిష్టం
నిద్రపోతుంటావు నీవు
ప్రకృతిలో ప్రతీది ప్రత్యేకం
అంటాను నేను
ఏముంది కొత్తగా
నీ భ్రమ అంటావు నీవు
ప్రతి దానికి స్పందిస్తాను నేను
నీవొక పిచ్చివాడనంటు చూస్తావు
జతలో ఇద్దరం
ఆలోచనల్లో భిన్నత్యం
నీవు చూసేది అందం
నేను ఆశించేది సౌందర్యం
నాది భావుకత
నీది వాస్తవికత
మనమద్య కనీ కనపడని
పల్చని తెర
నా ఎదుట నీవు
నీ ఎదుటనేను
సమాంతర రేఖల్లా
కలిసి నడుస్తుంటాం
ఎప్పుడూ కలసుకోలేం
ఒకరినొకరు చూసుకుంటుంటాం
కలిసి ఉండలేం
భూమ్యాకాశాల్లా ...
కళ్లే వెంకటేశ్వర శాస్త్రి
Next Story