అక్షరం

ఊయలై మనసంతా

ఊగుతుంది నీకోసం

కోయిలవై వాలిపో

కొత్త పాట పాడిపో

ఆకాశం వెన్నెలమ్మ

అందాలను అద్దిపో

తొలి సంధ్య వెలుగుల

తిలకాలను దిద్దిపో

ప్రకృతమ్మ రుతురాగం

పదనిసలు మీటిపో

ప్రతినిత్యం వసంతం

పూచే చెట్లు నాటిపో

సిరిసంపద ఒక వర్గం

చిత్రమేంటో తెలిసిపో

ఆకలంతా ఒకవర్గం

ఆస్తి కుట్ర విప్పిపో

కర్మ ధర్మ పాప పుణ్య

కనికట్టును తెంపిపో

ఆధునిక భావజాల

ఆలోచన నింపిపో

మేకవన్నె పులి నైజం

మేలిముసుగు విప్పిపో

పరిపాలన నియంతృత్వ

ప్రమాదాన్ని చెప్పిపో

వేటకాడి రాజ్యంలో

వేగుచక్క నిలిపిపో

తిరగబడే జనంఘోష

తీర్పు ఏంటో పలికిపో

పోటెత్తిన జన సముద్ర

పోరు శ్రుతిని తాల్చిపో

అవినీతి రాజకీయ

అంగడంతా పేల్చిపో

కొమ్మపైన స్వేచ్ఛ పక్షి

కోలాటం నేర్పిపో

చిలక బతుకు పంజరంలో

శిక్ష ముడిని విప్పిపో

అక్షరమై మొలకెత్తి

ఆయుధంగా నిలిచిపో

చీకటిని తరిమివేసె

చిరకాంతిగా వెలిగిపో

-వేల్పుల నారాయణ