మేఘం ఒక సందేశం (కవిత)
BY Telugu Global3 Nov 2022 7:20 AM GMT
X
Telugu Global Updated On: 3 Nov 2022 7:20 AM GMT
ఆకాశం నుండి కురిసింది
వాన కాదు అమృత సోన
దాహ తీవ్రత గొంతు గర్భంలో
పురిటి నొప్పులు పడుతున్నప్పుడు
ఊరటనిచ్చే వర్షం
పురుడు పోసిన మంత్రసాని హస్తం.
ఒక్కోసారి వర్షం చల్లని సంజీవని
ఒక్కోసారి గుండెల్లో దడ పుట్టించే
బీభత్సం
ఒక్కోసారి వర్షం ఒక్క బొట్టు రాల్చక
నా జనం కళ్ళని నింపిన
కన్నీటి సంద్రం.
ఒక్కోతూరి వాన పచ్చని పొలాలు
ధ్వంసించే కార్చిచ్చు
ఒక్కోతూరి వాన సమతుల్యతతో
రైతుకి పోసిన పంచప్రాణాలు
ఒక్కోతూరి కురవాల్సిన
పల్లెల్ని ఎండగట్టి
అవసరం లేని నగరాల్ని
ముంచేసే దౌర్భాగ్యం
ప్రకృతి లోకాలకి అన్నం పెట్టే అమ్మ
ఆ ప్రకృతినే భక్షించ చూస్తే
లేదు మానవాళికి మరో జన్మ.
- మాధవీసనారా (అనకాపల్లి)
Next Story