టీడీపీలోకి వైఎస్‌ సునీతకు స్వాగతమంటూ భారీగా పోస్టర్లు.. ప్రొద్దుటూరులో కలకలం

ప్రొద్దుటూరు పట్టణంలో సోమవారం అర్ధరాత్రి వైఎస్ సునీత పేరిట వెల‌సిన పోస్టర్లు కలకలం సృష్టిస్తున్నాయి. కొందరు గుర్తు తెలియని వ్యక్తులు పట్టణ వ్యాప్తంగా పోస్టర్లను అతికించినట్లు తెలుస్తోంది. ఆ పోస్టర్లలో టీడీపీలో చేరనున్న వైఎస్ సునీతకు స్వాగతం.. సుస్వాగతం.. అని ఆహ్వానిస్తున్నట్లుగా ఉంది. ఈ పోస్టర్లు ప్రస్తుతం రాజకీయంగా కాకపుట్టిస్తున్నాయి. కొద్దిరోజులుగా ఆంధ్రప్రదేశ్ రాజకీయాలు వైఎస్ వివేకానంద రెడ్డి హత్య కేసు చుట్టూ తిరుగుతున్నాయి. ఇప్పటికే ఈ కేసులో వైఎస్ భాస్కర్ రెడ్డి అరెస్ట్ అయ్యారు.

ఆయన తనయుడు, కడప ఎంపీ అవినాష్ రెడ్డిని కూడా త్వరలో అరెస్టు చేస్తారని ప్రచారం జరుగుతోంది. అవినాష్ రెడ్డి కూడా ముందస్తు బెయిల్ కోసం తీవ్రంగా ప్రయత్నిస్తున్నారు. ఈ నేపథ్యంలో అవినాష్ రెడ్డి మద్దతుదారులు కొంతమంది వైఎస్ సునీత త్వరలో టీడీపీలో చేరబోతుంద‌న్నార‌ని, ఆ పార్టీ నేతలతో కలిసి సునీత అవినాష్ రెడ్డి కుటుంబాన్ని వివేకా హత్య కేసులో ఇరికిస్తున్నార‌ని ఆరోపణలు చేస్తున్నారు. ఈ నేపథ్యంలో సోమవారం అర్ధరాత్రి ప్రొద్దుటూరు పట్టణంలోని పలు ప్రాంతాల్లో, ప్రధాన కూడళ్ళలో టీడీపీలో చేరనున్న వైఎస్ సునీతకు స్వాగతం.. సుస్వాగతం.. అని పోస్టర్లు వెలిశాయి.

ఆ పోస్టర్లలో సునీత తండ్రి వైఎస్ వివేకానంద రెడ్డి, భర్త నర్రెడ్డి రాజశేఖర్ రెడ్డి ఫొటోలు ఉన్నాయి. అలాగే టీడీపీ అధినేత చంద్రబాబు, అచ్చెన్నాయుడు, లోకేష్, జిల్లా నాయకులు ఆర్. శ్రీనివాసులు రెడ్డి, బీటెక్ రవి ఫొటోలు కూడా ఉన్నాయి. ఈ పోస్టర్లు ప్రస్తుతం రాష్ట్రవ్యాప్తంగా కలకలం సృష్టిస్తున్నాయి.

సునీత త్వరలో టీడీపీలో చేరబోతోందని కొద్దిరోజులుగా వైసీపీ నాయకులు ఆరోపణలు చేస్తున్న సంగతి తెలిసిందే. వారే కావాలని ఈ పనికి పాల్పడ్డారా? లేకపోతే నిజంగానే టీడీపీ శ్రేణులే ఈ పోస్టర్లు అతికించాయా..అన్నది తెలియాల్సి ఉంది. అయితే పోస్టర్లను అర్ధరాత్రి సమయంలో అతికించాల్సిన అవసరం ఏముందనే ప్రశ్న తలెత్తుతోంది.