బుల్లి రాకెట్ తో ఇస్రో విజయం.. SSLV D2 ప్రయోగం సఫలం

స్మాల్ శాటిలైట్ లాంచ్ వెహికల్ SSLV తో ఇస్రో తొలి విజయం నమోదు చేసింది. గతేడాది ఆగస్ట్ లో SSLV D1 ప్రయోగం విఫలమైంది. ఆ తర్వాత కసితో పనిచేశారు శాస్త్రవేత్తలు. లోపాలు తెలుసుకున్నారు, సరిదిద్దుకున్నారు. ఏడాది తిరక్కముందే SSLV D2 ని ప్రయోగించి విజయం అందుకున్నారు. ఈ రాకెట్ ద్వారా మొత్తం మూడు బుల్లి ఉపగ్రహాలను కక్ష్యల్లో ప్రవేశ పెట్టారు.

చిన్న ఉపగ్రహాలను ప్రయోగించడానికి ఇస్రో ప్రయోగాత్మకంగా చేపట్టిన ప్రాజెక్ట్ SSLV. SSLV-D1 సాంకేతిక కారణాలవల్ల విఫలం కావడంతో ఇస్రో వాటిని సరిదిద్దుకుని SSLV-D2 ప్రయోగించింది. ఈ రోజు వేకువజామున 2.48 గంటలకు కౌంట్ డౌన్ ప్రారంభం కాగా, సరిగ్గా 9.18 గంటలకు షార్‌ లోని మొదటి ప్రయోగ వేదిక నుంచి రాకెట్ నింగిలోకి దూసుకెళ్లింది.

ఇస్రోకు చెందిన 156.3 కిలోల బరువుగల EOS -07 ఉపగ్రహంతో పాటు అమెరికాలోని అంటారిస్‌ సంస్థకు చెందిన 11.5 కిలోల జానుస్‌-1, చెన్నై స్పేస్‌ కిడ్జ్‌ ఇండియా ఆధ్వర్యంలో ప్రభుత్వ ఉన్నత పాఠశాలల బాలికలు 750మంది కలసి రూపొందించిన 8.7 కిలోల ఆజాదీశాట్‌-2ను భూ సమీప కక్ష్యల్లో ఈ రాకెట్ ప్రవేశ పెట్టింది.

రాకెట్‌ ప్రయోగం మొత్తం 15 నిమిషాల్లో పూర్తయిందని తెలిపారు శాస్త్రవేత్తలు. భూ ఉపరితలానికి 450 కిలోమీటర్ల ఎత్తులో EOS -07 శాటిలైట్ ని ప్రవేశ పెట్టారు. ఆ తర్వాత వరుసగా జానుస్‌-1, ఆజాదీశాట్‌ వాటి కక్ష్యల్లో కుదురుకున్నాయి. దీంతో ప్రయోగం విజయవంతమైందని శాస్త్రవేత్తలు ప్రకటించారు.