Vidya Vasula Aham - మరో డైరక్ట్ ఓటీటీ రిలీజ్

ఓవైపు థియేట్రికల్ రిలీజెస్ తో పాటు, ఓటీటీ రిలీజ్ లు కూడా జోరుగా నడుస్తున్న టైమ్ ఇది. మొన్నటికిమొన్న మై డియర్ దొంగ అనే సినిమా నేరుగా ఓటీటీలోకి వచ్చింది. అభినవ్ గోమటం ఇందులో హీరోగా నటించాడు. దీనికి ఓ మోస్తరు రెస్పాన్స్ వచ్చింది. ఇప్పుడు మరో సినిమా నేరుగా ఓటీటీలోకి రాబోతోంది. దీని పేరు విద్య వాసుల అహం.

టైటిల్ లోనే ఈ సినిమా కథ ఏంటనేది చెప్పేశారు. విద్య, వాసు ఇద్దరూ ప్రేమించి పెళ్లి చేసుకుంటారు. పెళ్లి తర్వాత ఇగోల కారణంగా వాళ్ల లైఫ్ ఎలా మారిందనేది ఈ సినిమా స్టోరీ. కొత్తగా పెళ్ళైన కపుల్ కథలతో తెలుగులో ఇప్పటికే కొన్ని సినిమాలు వచ్చినప్పటికీ ఈ మూవీ మాత్రం కొంచెం ప్రత్యేకం అని చెబుతోంది యూనిట్.

రాహుల్ విజయ్ వాసు గా, శివాని రాజశేఖర్ విద్య పాత్రలో భార్యభర్తలు అని పోస్టర్ చూస్తే తెలుస్తోంది. టైటిల్ లో కూడా వివాహం అనేది హైలైట్ అయ్యేలా ఉంది. ట్యాగ్ లైన్ ‘ లాంగ్ లాంగ్ ఈగో స్టోరీ ‘ అని ఉంది. ఈ మోడ్రన్ డేస్ లో పెళ్ళైన జంటల మధ్య ప్రేమతో పాటు ఇగో కూడా ఉంటోంది. దాన్ని హైలెట్ చేస్తూ ఈ సినిమా తీశారు.

ఎటర్నిటీ ఎంటర్టైన్మెంట్ బ్యానర్ లో మహేష్ దత్త నిర్మించిన ఈ సినిమాకు మణికాంత్ గెల్లి దర్శకుడు. ఈ సినిమా అయినా తన కెరీర్ కు కలిసొస్తుందని భావిస్తోంది శివానీ. మూవీలో అవసరాల శ్రీనివాస్, అభినయ, శ్రీనివాస్ రెడ్డి, తనికెళ్ల భరణి కీలక పాత్రలు పోషించారు.