జయ జయ జయహో ..!!(కవిత)

అంతులేని దేశ భక్తితో

ఆలయంలో అర్చకుల్లా

అమ్మ భారతికి స్వేచ్ఛా

పుష్పాలతో పూజ చేసి

వేద భూమికి

వేల గొంతులతో

స్వాతంత్య్ర మంత్ర ఘోషతో

రుధిరాభిషేకాలు చేసిన

సమర వీరులకు జయహో

అమర యోధుల త్యాగఫలం

అరుల చేతికి చిక్కకుండా

పరుల పాలై పుణ్యభూమి

పతన దశకు జార కుండా

అవని కోసం అసువులైనా

అవలీలగా అర్పించే

దమ్ము గల ధీరులకు శూరులకు జయహో

అలసి పోయి

కునుకు తీయక

పోరు వస్తే పారిపోక

జన్మభూమి రక్షణ బద్దులై

సరి హద్దుల సంరక్షణ సన్నద్ధులై

సాయుధ దళములో సంసిద్దులై

సమర్ధులై విజయార్ధులైన

సిపాయిలకు జయహో

జన ప్రీతితో జవానులై

జగమంత కుటుంబం

మాదంటూ

జామురేయయినా

జగతి మొత్తం జోగుతున్నా

జాగోరె జాగంటూ జాతి కోసం జాగిలాల్లా కాపు కాసే

సాటిలేని మేటి సైనికులకు

జయ జయ జయ జయహో.

-దుద్దుoపూడి అనసూయ