శ‌శిక‌ళ‌ని జైలుకి పంపాల‌ని ఎందుకంత ఆత్రం...జ‌య‌ల‌లిత‌కు మ‌రోసారి సుప్రీం మొట్టికాయ‌లు!

ప్ర‌జాజీవితంలో ఉన్న‌పుడు విమ‌ర్శ‌లు వ‌స్తాయి…వాటిని ప‌ట్టుకుని అదేప‌నిగా ప‌రువున‌ష్టం దావాలు వేయ‌టం సరికాదంటూ సుప్రీంకోర్టు త‌మిళ‌నాడు ముఖ్య‌మంత్రి జ‌య‌ల‌లిత‌ను ఇటీవ‌ల కాస్త గ‌ట్టిగానే మంద‌లించిన సంగ‌తి తెలిసిందే. శుక్ర‌వారం సుప్రీంకోర్టు త‌మిళ‌నాడు ప్ర‌భుత్వ తీరుని మ‌రోసారి త‌ప్పుప‌ట్టింది. అన్నాడిఎంకె నుండి బ‌హిష్క‌ర‌ణ‌కు గుర‌యిన రాజ్య‌స‌భ స‌భ్యురాలు శశిక‌ళా పుష్ప‌కు అనుకూలంగా తీర్పునిస్తూ… జ‌య‌ల‌లిత ప్ర‌భుత్వ‌తీరుని ప్ర‌శ్నించింది.

శ‌శిక‌ళ భ‌ర్త కుమారుడు, ప‌నిమ‌నుషుల‌ను లైంగికంగా హింసించారనే ఆరోప‌ణ‌లు ఉండ‌గా.. ఆ కుటుంబ స‌భ్యులపై పోలీసులు కేసులు న‌మోదు చేశారు. మ‌ద్రాస్ హైకోర్టు మ‌ధురై ధ‌ర్మాసనం….శ‌శిక‌ళ ఆమె కుటుంబ స‌భ్యులు ఈనెల 29న కోర్టుముందు హాజ‌రుకావాల‌ని స‌మ‌న్లు జారీ చేయ‌టంతో శ‌శిక‌ళ సుప్రీంకోర్టుకి వెళ్లారు. అయితే త‌మిళ‌నాడు పోలీసుల ఉత్సాహానికి అడ్డుక‌ట్ట వేస్తూ… శ‌శిక‌ళ‌ కుటుంబాన్ని అరెస్టు చేసే వీలు లేకుండా…అరెస్టుపై స్టేని ఆరువారాల‌పాటు పొడిగిస్తూ సుప్రీంకోర్టు తీర్పునివ‌చ్చింది.

అంతేకాదు, త‌మిళ‌నాడు ప్ర‌భుత్వానికి శ‌శిక‌ళ‌ను క‌ట‌క‌టాల వెనక్కు పంపాల‌ని ఎందుకంత తొంద‌ర‌గా ఉంది…అని కోర్టు ప్ర‌శ్నించింది. దీనిపై విచార‌ణ జ‌రిపిన‌ సుప్రీంకోర్టు ప్ర‌ధాన న్యాయ‌మూర్తి టిఎస్ ఠాకూర్‌…ఆమె మ‌హిళా ఎంపి…ఎక్క‌డికీ పారిపోరు…అంటూ… ఎందుకంత కంగారు..ఆమె హాజ‌రుకావాల‌ని ఎందుక‌లా ప‌ట్టుబ‌డుతున్నారు…అంటూ ప్ర‌భుత్వ త‌ర‌పు న్యాయ‌వాది సుబ్ర‌మ‌ణ్యం ప్ర‌సాద్‌ని ప్ర‌శ్నించారు. ఆమె కోర్టుముందు హాజ‌రుకావాల‌ని రాష్ట్ర‌ప్ర‌భుత్వం ప‌ట్టుప‌డుతున్న తీరుని చూస్తుంటే ఈ కేసులో వెలుగులోకి రాని ఇత‌ర కోణాలున్నాయ‌ని అనిపిస్తోంద‌ని…ఆమె మీపై చేసిన ఆరోప‌ణ‌ల‌కు దీన్ని ప్ర‌త్యారోప‌ణ‌లుగా భావించాల్సి ఉంటుంద‌ని కోర్టు పేర్కొంది. అనంత‌రం కోర్టు… స‌మ‌న్ల‌కు అనుగుణంగా వ్య‌వ‌హ‌రించాల్సిందిగా శశిక‌ళ‌ను ఆదేశిస్తూ…ఆమె కోరుతున్న ముంద‌స్తు బెయిల్ పిటీష‌న్ పై నిర్ణ‌యం తీసుకోవాల్సిందిగా మ‌ద్రాస్ హైకోర్టుకి సూచించింది.

Click on Image to Read: