ఎఫ్3 ఓటీటీ రిలీజ్ డేట్ ఫిక్స్

థియేటర్లలో నవ్వులు పూయించిన ఎఫ్3 సినిమా. ఇప్పుడు ఓటీటీని నవ్వులతో ముంచెత్తడానికి రెడీ అయింది. తాజాగా థియేట్రికల్ రన్ పూర్తి చేసుకున్న ఈ సినిమా, ఇప్పుడు ఓటీటీ విడుదల కోసం పరుగులు పెడుతోంది. వెంకటేష్,వరుణ్ తేజ్ హీరోలుగా నటించిన ఈ మల్టీస్టారర్ మూవీ ఈనెల 22న ఓటీటీలో స్ట్రీమింగ్ కు రాబోతోంది.

అనీల్ రావిపూడి దర్శకత్వంలో దిల్ రాజు నిర్మించిన భారీ బడ్జెట్ కామెడీ ఎంటర్ టైనర్ ఎఫ్3. ఈ సినిమా ప్రొడక్షన్ కాస్ట్ కంటే, రెమ్యూనరేషన్లే ఎక్కువయ్యాయి. అంతమంది ఆర్టిస్టులున్నారు ఈ సినిమాలో. కానీ బిజినెస్ మాత్రం బాగా చేసింది. మరీ ముఖ్యంగా నాన్-థియేట్రికల్ అదరగొట్టింది.

ఎఫ్3 సినిమా శాటిలైట్ రైట్స్ ను జీ తెలుగు ఛానెల్ దక్కించుకోగా.. డిజిటల్ రైట్స్ ను సోనీ లివ్ దక్కించుకుంది. ఇప్పుడా ఓటీటీ వేదికగానే జులై 22న ఈ సినిమా స్ట్రీమింగ్ కు రాబోతోంది. గమ్మత్తైన విషయం ఏంటంటే.. ఈ సినిమా డీల్ అయినప్పుడు ఈ రెండు వేర్వేరు సంస్థలు. కానీ జీ తెలుగు, సోనీ కలిసిపోయాయి. కాబట్టి భవిష్యత్తులో ఈ సినిమా జీ5 యాప్ లో ప్రత్యక్షమైనా ఆశ్చర్యపోనక్కర్లేదు.

సినిమాలో వెంకీ సరసన తమన్న, వరుణ్ సరసన మెహ్రీన్ హీరోయిన్లుగా నటించారు. సోనాల్ చౌహాన్ కీలక పాత్రలో కనిపించగా, పూజాహెగ్డే ఐటెంసాంగ్ చేసింది. సునీల్, రఘుబాబు కామెడీ ప్రత్యేక ఆకర్షణగా నిలిచింది.