అడ్వాన్స్ ఓకే.. డైరక్టర్ ఎక్కడ?

ఓవైపు వకీల్ సాబ్ సినిమా హిట్టా, ఫ్లాపా, యావరేజా అనే చర్చ నడుస్తుండగానే.. మరోవైపు పవన్ కల్యాణ్ కు మరోసారి అడ్వాన్స్ ఇచ్చాడు దిల్ రాజు. అవును.. పవన్-దిల్ రాజు కాంబినేషన్ లో మరో సినిమా రాబోతోంది. కాకపోతే ఇక్కడో మెలిక ఉంది.

పవన్ కు దిల్ రాజు అడ్వాన్స్ ఇచ్చాడనేది దాదాపు నిజం. కాకపోతే అది నామ్ కే వాస్తే జరిగిన సంగతి. పవన్ ఏ కథకు ఓకే చెప్పలేదు. ఇంకా చెప్పాలంటే దిల్ రాజు ఎలాంటి కథలు వినిపించలేదు. దర్శకుల్ని పరిచయం చేయలేదు. కేవలం అడ్వాన్స్ ఇవ్వడం, పవన్ అందుకోవడం మాత్రమే జరిగాయి.

ఇప్పుడు పవన్ కోసం ఓ దర్శకుడ్ని వెదికే పనిలో దిల్ రాజు బిజీ అయ్యారు. పవన్ ఇమేజ్ కు తగ్గట్టు ఎవరైనా ఓ మంచి కథ చెబితే, మరోసారి పవన్ తో సినిమా నిర్మించడానికి దిల్ రాజు రెడీ అన్నమాట. కాకపోతే ఇప్పటికిప్పుడు దిల్ రాజు కంగారు పడాల్సిందేం లేదు. 2022 చివరి నాటికి కానీ పవన్ ఫ్రీ అవ్వడు. ఈలోగా ఎవరో ఒక దర్శకుడ్ని పట్టుకోవడం, పవన్ ను ఒప్పించడం దిల్ రాజుకు పెద్ద సమస్య కాదు.