ఈటల మాటల ‘మంటలు’ దేనికి సంకేతం?

ఇటీవల తెలంగాణ ఆరోగ్యశాఖ మంత్రి ఈటల రాజేందర్​ చేసిన వ్యాఖ్యలు సంచలనంగా మారాయి. ఓ వైపు రెండు ఎమ్మెల్సీ స్థానాల్లో తెలంగాణ రాష్ట్ర సమితి గెలుపొంది.. ఆ పార్టీ శ్రేణులు సంబురాల్లో మునిగి తేలుతుండగా మంత్రి ఈటల రాజేందర్​ సడెన్​గా బాంబు పేల్చారు. డబ్బు, కులం కాదు మనిషిని గుర్తు పెట్టుకోవాలంటూ ఆయన సంచలన ప్రకటన చేశారు. తెలంగాణలో అమలవుతున్న సంక్షేమ పథకాలపై కూడా వ్యంగ్యంగా మాట్లాడారు .. కల్యాణలక్ష్మి, కేసీఆర్​ కిట్​ వంటి స్కీమ్స్​ పై మాట్లాడుతూ.. ‘పరిగే ఏరుకోవడం కాదు.. పంట పండించుకోగలగాలి’ అంటూ నర్మ గర్భంగా స్టేట్​మెంట్​ ఇచ్చారు. ఈటల ప్రకటనలతో టీఆర్​ఎస్​ శ్రేణుల్లో గందరగోళం నెలకొన్నది.

ఆరోగ్యమంత్రిగా ఉన్న ఈటల రాజేందర్ ఎందుకు ఇలా మాట్లాడారో? ఎవరికీ అంతు చిక్కడం లేదు. అయితే కొంతకాలంగా ఈటల రాజేందర్​కు సీఎం కేసీఆర్​కు గ్యాప్​ వచ్చినట్టు సమాచారం. గతంలో ఇటువంటి వార్తలు వచ్చాయి. అప్పట్లో టీఆర్​ఎస్​ పార్టీకి అసలైన ఓనర్లము మేమే అంటూ కూడా ఈటల సంచలన ప్రకటన చేశారు. ఇదిలా ఉంటే తాజా ప్రకటనలు తీవ్ర వివాదాస్పదంగా మారాయి. ఇటీవల నిర్వహించిన బడ్జెట్​ సమావేశాలకు ఈటల రాజేందర్​ను ఆహ్వానించలేదని సమాచారం. మరోవైపు ఎమ్మెల్సీ ఎన్నికల బాధ్యతలను కూడా ఈటలకు అప్పగించలేదట. దీంతో ఆయన నొచ్చుకున్నట్టు సమాచారం.

ఇదిలా ఉంటే ఈటల రాజేందర్​ త్వరలో టీఆర్​ఎస్ ను వీడబోతున్నట్టు కూడా వార్తలు వస్తున్నాయి. ఆయన మంత్రివర్గంలోనుంచి తప్పుకోబోతున్నారంటూ చర్చ నడుస్తున్నది. అయితే గతంలోనే ఇటువంటి ఆరోపణలే రాగా సీఎం కేసీఆర్​ స్వయంగా రంగంలోకి దిగి .. ఈటలను బుజ్జగించారు. నిజానికి కరీంనగర్​ జిల్లాకు చెందిన గంగుల కమలాకర్​కు కేసీఆర్​ క్యాబినెట్​లో అవకాశం ఇచ్చారు. అక్కడ ఈటలకు, గంగులకు మధ్య ఆధిపత్య పోరు ఉంటుంది. గంగులకు మంత్రి పదవి ఇవ్వడం.. జిల్లాలోని ముఖ్యమైన బాధ్యతలన్నీ అతడికే అప్పగించడంతో ఈటల మనస్తాపానికి గురయినట్టు సమాచారం.

తొలి నుంచి కేసీఆర్​ వెంట నడిచి .. ఉద్యమంలో పాల్గొన్న తనను కాదని.. టీడీపీ నుంచి వచ్చిన గంగుల కమలాకర్​ను భుజాల మీదకు ఎత్తుకోవడం ఈటలకు అస్సలు నచ్చడం లేదని సమాచారం. మరోవైపు కేసీఆర్​ కుమారుడు, ఐటీ శాఖ మంత్రి కేటీఆర్​తోనూ ఈటలకు కొన్ని విబేధాలు ఉన్నట్టు టాక్​. ఇదిలా ఉంటే ఈ వివాదానికి త్వరలోనే ఎండ్​ కార్డు ఎప్పుడు పడుతుందో వేచి చూడాలి.