'మహర్షి' వేడుక కోసం వేలల్లో అభిమానులు

టాలీవుడ్ సూపర్ స్టార్ మహేష్ బాబు కెరీర్ లో 25వ సినిమా అయిన ‘మహర్షి’ మే 9న విడుదల కాబోతున్న సంగతి తెలిసిందే. వంశీ పైడిపల్లి దర్శకత్వంలో పూజా హెగ్డే హీరోయిన్ గా నటిస్తున్న ఈ సినిమాపై భారీ అంచనాలు నెలకొన్నాయి.

ఈ సినిమా ప్రమోషన్స్ లో భాగంగా ఈ చిత్రం ప్రీ రిలీజ్ ఈవెంట్ గ్రాండ్ గా నిర్వహించేందుకు సిద్ధమవుతోంది చిత్ర బృందం. మే 1వ తేదీన హైదరాబాద్ లోని పీపుల్స్ ప్లాజా లో ‘మహర్షి’ ప్రీ రిలీజ్ వేడుక జరగబోతుంది.

పీపుల్స్ ప్లాజాలో 18వేల ప్రేక్షకుల కెపాసిటీ ఉంది. కాబట్టి ఈ వేడుకకు వేలల్లో అభిమానులు తరలి రానున్నారని అంటున్నారు.

ఇక ప్రమోషన్స్ పరంగా చూస్తే ఈ సినిమా టీజర్ కు ప్రేక్షకుల నుంచి మంచి రెస్పాన్స్ వచ్చింది. అంతేకాక ఈ సినిమా నుంచి ఐదు పాటలను విడుదల చేసి ప్రేక్షకుల దృష్టిని ఆకర్షించారు దర్శక నిర్మాతలు.

అల్లరి నరేష్ ఈ సినిమాలో ముఖ్యపాత్ర పోషిస్తున్నాడు. దిల్ రాజు, పీవీపీ, అశ్వినీ దత్ సంయుక్తంగా నిర్మిస్తున్న ఈ సినిమాకు దేవిశ్రీ ప్రసాద్ సంగీతాన్ని అందిస్తున్నారు. ఈ సినిమాలో మహేష్ బాబు మూడు విభిన్న అవతారాలలో కనిపించబోతున్నారు.