కుక్క కనిపెట్టింది కానీ నాగార్జున కనిపెట్టలేదట

మజిలీ ప్రస్తుతం అందరినీ ఆకర్షిస్తున్న చిత్రం. అక్కినేని నాగ చైతన్య, సమంత జంటగా నటించిన ఈ చిత్రం రాబోయే శుక్రవారం నాడు విడుదల కానున్నది. పెళ్ళి తర్వాత మొదటి సారిగా ఈ ఇద్దరూ కలిసి నటించడం తో ఈ సినిమా మీద భారీ అంచనాలు ఉన్నాయి. పైగా సినిమా లో కూడా వీళ్ళు ఇద్దరూ భార్య, భర్తల పాత్రలు పోషించడం తో అభిమానులకి సినిమా మీద ఎనలేని ఆసక్తి కలుగుతుంది.

ఈ చిత్రానికి సంబంధించిన ప్రీ రిలీజ్ ఈవెంట్ నిన్న హైదరాబాద్ లో ఘనం గా జరిగింది. నాగార్జున అక్కినేని మరియు వెంకటేష్ దగ్గుబాటి ఈ ఈవెంట్ కి ముఖ్య అతిథులు గా విచ్ఛేసారు. అయితే ఆసక్తికరమైన విషయం ఏంటి అంటే నాగార్జున స్పీచ్. ఈవెంట్ లో మాట్లాడుతూ తన కొడుకు కోడలు గురించి గొప్పగా చెప్పాడు నాగార్జున.

“ఏ మాయ చేసావే చూసినప్పుడు ఈ జంట బాగుంది అని అనుకున్నాను. కానీ అదేంటో గానీ తెర వెనుక వీరు రొమాన్స్ నడుపుతున్న విషయం అర్ధం చేసుకోలేక పోయాను. మనం సినిమా చేసేటప్పుడు కూడా నాకు ఆ విషయం అర్ధం కాలేదు. ఒకసారి సమంత మా ఇంటికి వచ్చినప్పుడు మా ఇంట్లో కుక్క వెళ్ళి సమంత తో ఆడుకుంది. దానికి తెలిసిన విషయం నాకు తెలియలేదు. మా మంచి అబ్బాయి కి మంచి కోడలు దొరికింది” అని నాగార్జున చెప్పారు.