ఎవ‌రు మ‌నిషి...ఎవ‌రు జంతువు!

కుక్క‌లు మ‌నుషులను క‌రిచే కాలం కాదిది. మ‌నుషులే కుక్క‌ల‌ను క‌రుస్తున్న కాల‌మిది. ఈ సంఘ‌ట‌న అదే చెబుతోంది మ‌రి. ఓ కుక్క‌ను ఓ భ‌వ‌నం పైనుండి కింద‌కు విసిరేసి దాన్ని వీడియో తీసి నెట్‌లో పెట్టారు ఇద్ద‌రు యువ‌కులు. వీరిద్ద‌రు మెడిక‌ల్ స్టూడెంట్స్. ప్రాణాల‌ను కాపాడే విద్య‌ని అభ్య‌సిస్తున్న వీరికి ఈ తెగులు ఏమిటో. ఇలాంటి పనితో వారు పొందిన ఆనందానికి ఏ పేరు పెట్టాలో కూడా తెలియ‌ని ప‌రిస్థితి.

నెట్‌లో ఈ వీడియోని చూసిన ప‌లువురు నెటిజ‌న్లు, జంతు ప్రేమికులు వారిపై తీవ్ర‌మైన ఆగ్ర‌హాన్ని వ్య‌క్తం చేశారు. కుక్క‌ను కింద‌కు విసిరేసి, వీడియోకి పోజిచ్చిన విద్యార్థి గౌతం సుద‌ర్శ‌న్‌గా, ఈ వికృత చ‌ర్య‌ని వీడియో తీసిన విద్యార్థిని ఆశిష్ పాల్‌గా గుర్తించారు. కుక్క‌ను జంతుసంర‌క్ష‌ణ కార్య‌క‌ర్త శ్ర‌వ‌ణ్ కృష్ణ‌న్ కాపాడి చికిత్స అందిస్తున్నారు. ఆ ఆడ‌కుక్క న‌డిచే ప‌రిస్థితిలో లేద‌ని శ్ర‌వ‌ణ్ తెలిపాడు.

అత‌ను పోలీస్ కేసు పెట్ట‌డ‌మే కాకుండా పోలీసులు న‌మోదు చేసిన ఎఫ్ఐఆర్‌ని ఫేస్‌బుక్‌లో పోస్ట్ చేశాడు. వారిద్ద‌రూ స‌రెండ‌ర్ కావాలని లేక‌పోతే వారు ప‌రీక్ష‌ల‌కు హాజ‌రు కాలేర‌ని పోలీసులు హెచ్చ‌రించిన‌ట్టుగా, కాలేజి ఛైర్మ‌న్ సైతం నిందితుల త‌ల్లిదండ్రుల‌కు ఫోన్ చేసి ఇదే విష‌యాన్ని చెప్పిన‌ట్టుగా ఆయ‌న పేర్కొన్నారు. పోలీసులు వీరికోసం గాలిస్తుండ‌గా వీడియోలో ఉన్న వ్య‌క్తిని ప‌ట్టిస్తే ల‌క్ష రూపాయ‌ల బ‌హుమ‌తి ఇస్తామ‌ని హ్యూమ‌న్ సొసైటీ ఇంట‌ర్నేష‌న‌ల్ సంస్థ ఇండియా విభాగం ప్ర‌క‌టించింది. అయితే ఇది జ‌రిగి దాదాపు రెండువారాలు అవుతోంద‌ని, ఆకుక్క మ‌ర‌ణించింద‌ని చెన్నై మిమీస్ అనే వెబ్‌సైట్ పేర్కొంది.